शीर्ष टोलीसँग जगजितको क्लबको बराबरी

कामामाडौं (हाम्रो खेलकुद)– नेपाली मिडफिल्डर जगजित श्रेष्ठको अस्ट्रेलियन क्लब नुनावडिङ सिटी एफसीले आइतबार एनपिएलमा बराबरी खेलेको छ । नुनावडिङले लिगको शीर्षस्थानमा रहेको टोली डांडेनङ सिटी एफसीसँग १–१ को बराबरी खेलेको थियो ।

जगजित पहिलो रोजाइमा परेको खेलमा नुनावडिङले अग्रता लिएपनि जोगाउन सकेन । ५१ औं मिनेटमा मिच कुपरले नुनावडिङका लागि गोल गरेका थिए । नुनावडिङको अफिसियल फेसबुकमा दिइएको जानकारी अनुसार ६६ औं मिनेटमा गोल फर्काउँदै डांडेनङले खेललाई बराबरीमा पुर्याएको थियो ।

नुनावाडिङ गएयता जगजितको त्यो छैटौं खेल थियो । टोलीले गत साता ३–१ को जित हासिल गर्दा जगजितले टोलीका लागि अन्तिम गोल गरेका थिए । नयाँ क्लबमा त्यो उनको पहिलो गोल थियो ।

जगजित गएयताका ६ मध्ये ३ खेल जितेको नुनावडिङले १ मा बराबरी र २ मा हार व्यहोरेको थियो । २० टोलीको सहभागिता रहेको एनपिएलका २३ खेलमा नुनावडिङको २५ अंक पुगेको छ ।