एजेन्सी – इङ्गलिस् प्रिमियर लिग च्याम्पियन चेल्सीसँगै स्पेनका दुई ठुला क्लब रियल म्याड्रिड र बार्सिलोनाले फ्रान्सका एक युवा डिफेन्डरलाई भित्र्याउने प्रयास गरिरहेका छन्। फ्रान्सेली खेलाडी मालाङ सारललाई भित्र्याउने प्रयासमा तिनै क्लबले उनको खेल हेर्न स्काउट पठाएको बुझिएको छ।

१८ वर्षीय सेन्टर डिफेन्डर सार हाल फ्रान्सेली लिग वान क्लब नओजिसी निससँग आबद्ध छन्। १७ वर्षको उमेरमा लिग वनमा डेब्यु गरेका उनले आफ्नो पहिलो खेलमै स्टाड रेन्नेसविरुद्ध गोल गरेका थिए। फ्रान्सको यू२१ राष्ट्रिय टोलीका सदस्य रहेका सारले गत सिजन निसका लागि ३१ खेल खेलेका थिए।

५ वर्षको उमेरदेखि निसमा रहेका सारको रिलिज क्लज ३६ मिलियन पाउण्ड तोकिएको छ। सन् २०१६को अन्त्यतिर आर्सनलले सारलाई अनुबन्धन गर्न खोजेपनि निसले उनलाई क्लबमै राखेको थियो। चेल्सीले यस सिजन एक डिफेन्डर भित्र्याएपनि प्रशिक्षक एन्टोनियो कन्टेले अझै एक डिफेन्डर भित्र्याउने सम्भावना रहेको छ। यसैगरि बार्सिलोना र रियलले पनि लामो समयदेखि सारलाई पछ्याइरहेको बुझिएको छ।

स्पेनिस लिगमा गत सिजन दोश्रो स्थानमा चित्त बुझाएको बार्सिलोनाले स्यामुएल उम्टिटी र जेरेमी म्याथुको प्रदर्शनमा सन्तुष्ट नभएकोले नयाँ खेलाडी किन्ने प्रयासमा छ। यसैगरी रियल म्याड्रिडमा पेपेको प्रस्थानसँगै टोलीमा आएका भालेहो र नाचो फर्नान्डेज मात्र विकल्पका रुपमा रहेका छन्।