स्पेन (एजेन्सी) – स्पेनिस च्याम्पियन रियल म्याड्रिडले फ्रान्सेली च्याम्पियन एएस मोनाकोका युवा फरवार्ड किलियन बाप्पेलाई भित्र्याउन राखेको १ सय ८० मिलियन युरोको प्रस्ताव फ्रान्सेली क्लबले स्वीकारेको छ। यसअघि पल पोग्बालाई भित्र्याउन युनाइटेडले तिरेको १ सय ५ मिलियन युरोको विश्व कीर्तिमानलाई यस सम्झौताले तोड्नेछ।

प्रतिष्ठित स्पेनिस पत्रिका मार्साले जनाए अनुसार बाप्पे यसै हप्ताभित्र रियल आउने छन्। यद्दपी रियलले प्रारम्भिक रुपमा १ सय ६० मिलियन तिर्ने र बाँकी २० मिलियन भने बोनसर बप्पेको प्रदर्शनका आधारमा दिइने बुझिएको छ। यदि बाप्पेले राम्रो प्रदर्शन गर्दै गएमा उक्त बोनस रकम ३० मिलियनसम्म पुग्न सक्ने सम्भावना पनि रहेको छ। रियलका अध्यक्ष फ्लोरेन्टिनो पेरेज, निर्देशक जोसे एन्जेल स्यान्चेज र प्रशिक्षक जिनेदिन जिदानले अमेरिकामा बसेको बैठकपछि यो निर्णय आएको हो।

मोनाकोले १ सय ९० मिलियनको माग गरेपनि रियलले १ सय ६० मिलियन मात्र दिने बताएको थियो। अल्भारो मोराटालाई ८० मिलियन युरोमा चेल्सी पुर्याएपछि बाप्पेलाई भित्र्याउने सम्भावना झन् बढेको हो। बाप्पेको आगमनसँगै रियलको ‘बिबिसी’माथि भने अझ धेरै दबाब पर्नेछ। प्रशिक्षक जिदानलाई पनि बाप्पे आएको खण्डमा टोलीलाई व्यवस्थापन गर्न निकै चुनौती बढ्नेछ।