मायमी (एजेन्सी)– ब्राजिलयन स्टार नेयमार बार्सिलोना टोलीसँग स्पेन नफर्कने भएका छन् । प्रि सिजनका लागि अमेरिका रहेको बार्सिलोनाले शनिबार एल क्लासिकोमा रियल म्याड्रिडको सामना गर्नेछ । इएसपिएनका अनुसार २५ बर्षे नेयमार बार्सिलोना र नाइकको प्रचारका लागि अमेरिकाबाट सिधै चीन जानेछन् ।

शनिबार एल क्लासिकोसँगै अमेरिकामा इन्टरनेसनल च्याम्पियन्स कपमा बार्सिलोनाको यात्रा टुंगिनेछ । यसैबीचमा प्रशिक्षणका दौरान नेयमार र डिफेन्डर सेमेडोबीच झगडा पारेको छ । सर्जियो बुस्केट्सले झगडा छुट्ट्याएसँगै नेयमारले रिसमा बिब्स फ्याँकेर मैदान छाडेका थिए।

ब्राजिलयन स्टार पेरिस सेन्ट जर्मेन (पिएसजी) जाने हल्ला केही सातादेखि चलिरहेको छ । २ सय २२ मिलियन युरो सरुवा रकम खर्चेरपनि पिएसजी नेयमार लान प्रयारत रहेको बताए । यद्दपी बार्सिलोनाका पदाधिकारीले भने उनी नोउ क्याम्पमै रहने दाबी गर्दै आएका छन् । नेयमार स्वयम्ले भने यो विषयमा अहिले सम्म मुख खोलेका छैनन् ।

नेयमार र उनका बुबा पिएसजीका कतारी मालिक र त्यहाँका स्पोर्टस डाइरेक्टर एटेरो हेरिक्वेसँग सुरुवाको विषयलाई लिएर सम्पर्कमा रहेको बताइएको छ । श्रोतका अनुसार ब्राजिलयन नेयमार चीनबाट सोझै पिएसजीको प्रशिक्षणमा सामेल हुने अपेक्षा गरिएको छ । यद्दपी चीन भ्रमणसम्म पनि उनले कुनै घोषणा नगर्ने अनुमान गरिएको छ ।