काठमाडौं (हाम्रो खेलकुद)– नेपाली राष्ट्रिय फुटबल टोलीका महत्वपूर्ण सदस्य रोहिच चन्द सम्मिलित इन्डोनेसियाको पर्सिजा जकार्ताले शीर्ष डिभिजनको लिगमा सोमबार सफलता हासिल गरेको छ ।

यो सिजन खासै राम्रो प्रदर्शन गर्न नसकेको रोहितको टोलीले सोमबार बारिटो पुतेरालाई १–० को झिनो अन्तरले हराएको थियो । ५५ औं मिनेटमा इन्डोनेसियाका हेरि सुसान्तोले गरेको गोल नै खेलको निर्णायक बन्यो । घरेलु मैदानमा प्राप्त सफलता पछि पर्सिजा अंक तालिकाको १३ औं स्थानमा उक्लेको छ ।

साविक विजेता समेत रहेको टोलीको १८ खेल सकिँदा ४ खेलमा मात्र जित हासिल गर्न सकेको छ । ८ खेलमा बराबरी गरेको रोहितको टोलीले ६ खेल गुमाइसकेको छ । अघिल्लो सिजन लिगका उत्कृष्ट खेलाडी रोहितले सोमबारको खेल पुरै समय खेलेका थिए ।

भदौ १९ गते चाइनिज ताइपेविरुद्धको विश्व कप छनोटको समूह चरण खेलेर रोहित सिधै इन्डोनेसिया गएका थिए । विश्व कप छनोटका लागि स्वदेश फर्कदा यसपटक टोलीका महत्वपूर्ण खेलाडी चोटग्रस्त रहेका कारण पनि लिगमा राम्रो खेल्न नसकेको बताएका थिए । उनले टोलीको प्रदर्शन कमजोर हुँदै जँदा दबाब पनि बढी अनुभव साटेका थिए ।

लिग १ मा १८ खेल सकिदा ४४ अंकका साथ बाली युनाइटेड शीर्षस्थानमा रहेको थियो । केहि दिन अघि रोहितको टोली बालीसँग पराजित भएको थियो ।