पेरिस (एजेन्सी) – गेराथ बेल प्रेरित वेल्स युरोपियन च्याम्पिनसिपको क्वार्टरफाइनलमा प्रवेश गरेको छ । उत्तरी आयरल्यान्डलाई १–० ले हराउँदै वेल्स अन्तिम आठमा प्रवेश गरेको हो ।

७५ औं मिनेटमा गेराथ म्याकआउलेले गरेको आत्मघाती गोल नै खेलको निर्णायक बनेको थियो । मैदानको बायाँबाट बेलले क्रस गरेको बल रोक्ने क्रममा म्याकआउलले आफनै पोस्टमा गोल गरेका थिए ।
वेल्सले क्वार्टरफाइनलमा हंगरी र बेल्जियमबीचको विजेतासँग खेल्नेछ । समूह चरणमा जस्तै नकआउटमा पनि रियल मड्रिडको प्रभाव निरन्तर रह्यो । उनले खेलभरमा सातवटा क्रस गरे भने गोलका लागि आक्रमण पनि गरे । वेलले प्रहार गरेको फ्रिकिक विपक्षी गोलकिपरले रोकेका थिए ।

खेलको म्यान अफ दि म्याच चुनिएका बेलले भने ,‘म के भनौं । हामीले राम्रो खेल्न सकेनौं । आदारपूर्वक भन्न सक्छु आयरल्यान्ड हामीलाई निकै अप्ठेरो बनायो । हामीले धेरै ठाँउ निकाल्न सकेनौं । तर मुख्य कुरा भनेको टोलीको जित हो त्यो एउटै गोल नै पर्याप्त भयो । ’

‘कतिपय अवस्थामा हामीहरु भन्दा उनीहरु उत्कृष्ट देखिए । तर पनि हाम्रो टोलीले सहासका साथ प्रतिस्पर्धा गर्यो ’ वेल्सका प्रशिक्षक क्रिस कोलेमानले भने, ‘हाम्रा खेलाडीले कुनै बेला हार मानेन् । अब क्वार्टरफाइनलमा हामीले निकै राम्रो खेल्नुपर्ने हुन्छ । उत्तरी आयरल्यान्ड आज अन्डरडग थियो । तर उनीहरुले निकै चुनौति दिए । ’