काठमाडौ (हाम्रो खेलकुद) – सहिद स्मारक बी डिभिजन खेलिरहेको नेपाली फुटबलको पुरानो मध्येको एक ब्वाइज युनियन क्लबलाई डिभाइन वाइनको उत्पादक महाकाली वाइन प्रालीले मुख्य प्रायोजन गरेको छ ।

एक वर्षका लागि बुधबार भएको सम्झौतापछि ब्वाइज युनियनलाई महाकाली वाइनले १५ लाख रुपैयाँ उपलब्ध गराउने छ । ‘बी’ डिभिजन क्लबले प्रायोजनवापत पाउन लागेको यो नेपाली फुटबलमा अहिलेसम्मकै सबभन्दा ठूलो रकम भएको बताइएको छ ।

ब्वाइज युनियनका अध्यक्ष सत्रुधन राजभण्डारी र महाकाली वाइनका अध्यक्ष किस्मत अधिकारीले हस्ताक्षर गरेका थिए ।

अब ब्वाइज युनियनले डिभाइन ब्वाइज युनियन क्लबका नामबाट फुटबलमा प्रतिस्पर्धा गर्नेछ । क्लबले बर्षभरी डिभाइन वाइनको लोकअंकित जर्सी प्रयोग गर्ने कार्यक्रममा जानकारी गराइएको थियो । ब्वाइज युनियन २०७० मा ए डिभिजनबाट घटुवा भएको थियो ।

महाकाली वाइनका अध्यक्ष अधिकारीले ब्वाइज युनियन ए डिभिजनमा उक्लन शुभकामना दिदै आगामी वर्षहरुमा पनि प्रायोजनलाई निरन्तरता दिने मौका मिलोस् भन्ने कामना गरे ।

क्लबलाई ए डिभिजनमा पुर्याउने लक्ष्य रहेको जनाउँदै ब्वाइज युनियनका अध्यक्ष राजभण्डारीले आँदा बर्षमा पनि प्रायोजकका रुपमा साथ पाउने विश्वास व्यक्त गरे ।

अखिल नेपाल फुटबल संघ (एन्फा) का उपाध्यक्ष कर्माछिरिङ शेर्पाले प्रायोजन गरेकोमा महाकाली वाइनलाई धन्यवाद दिदै एन्फाका प्रतियोगिताहरुमा डिभाइनको बोर्ड विज्ञापनस्वरुप राख्ने प्रतिबद्धता व्यक्त गरेका थिए ।