काठमाडौं (हाम्रो खेलकुद)– फरक प्रसंगमा राष्ट्रिय फुटबल टोलीका जर्मनी जोचेन फिगीले तीन दशक पछि नेपालको भ्रमण गरेका छन् । फिगीले सन् १९८४ मा नेपाली टोलीलाई प्रथम दक्षिण एसियाली महासंघिय खेलकुद (साफ हालको साग) मा स्वर्ण पदक दिलाएका थिए । त्यो नेपालको पहिलो अन्तर्राष्ट्रिय फुटबल उपाधि हो ।

नेपाली टोलीका पूर्व प्रशिक्षक फिगीसँग पूर्व कप्तान राजुकाजी शाक्य । पहिलो साफमा स्वर्ण जित्दा शाक्य टोलीका खेलाडी थिए ।

फिफा इन्स्ट्रक्टरको जिम्मेवारीका साथ उनी यसपटक फिफा एमए एलिट कोचिङ कोर्स सञ्चालनका लागि नेपाल आएका हुन् । बुधबार सुरु भएर पाँच दिन सम्म चल्ने कोर्समा ३० नेपाली प्रशिक्षकहरुको सहभागिता रहेको छ ।
कोर्सको उद्घाटनमा नपाललाई उपाधि दिलाउन सकेका स्मरण गर्दै फिगीले नेपालले आफुलाई सधै महत्वका साथ हेर्ने गरेको बताएका छन् ।
फेरी नेपाल आउने अवसर जुरेकोमा खुसी व्यक्त गर्दै फिगीले नेपाली फुटबललाई नजिकबाट हरिरहेको बताए । उनको सुझाव थियो,‘अझै राम्रो खेल्ने क्षमता नेपाली टोलीमा छ । छिमेकी राष्ट्रसँग मात्र होइन त्यो भन्दा बाहिर पनि प्रतिस्पर्धालाई फैलाउनु आवश्यक छ । साथै कडा मेहनत त गर्नैपर्छ ।’ पहिलो साफको फाइनलमा बंगलादेशलाई ४–२ हराउँदै नेपाल च्याम्पियन बनेको थियो । साफ लगत्तै एसिया कप छनोट खेल्न नेपाली टोली साउदी अरेबिया पुगेको थियो । त्यहाँ लज्जास्पदक हार बेहारेपछि फिगी त्यहिबाट स्वदेश फर्केका थिए ।

फिगीका साथ फिफा एलिट कोर्समा सहभागी प्रशिक्षकहरु ।