काठमाडौं, भदौ २९
अख्तियार दुरुपयोग अनुसन्धान आयोगले सत्यतथ्य र प्रमाणमा आधारित भएर युवा तथा खेलकुद मन्त्री पुरुषोत्तम पौडेललाई कारबाही गर्न प्रधानमन्त्री सुशिल कोइरालालाई अनुरोध गरेको जवाफ दिएको छ ।

अख्तियार दुरुपयोग अनुसन्धान आयोग

मन्त्री पौडेलले आइतबार पत्रकार सम्मेलन गर्दौ अख्तियारको निर्णय पूर्वाग्रही भएको आरोप लगाएको भोली पल्ट अख्तियारले त्यसको जवाफ दिएको हो । मन्त्री पौडेलले पत्रकार सम्मेलनमा दिएको अभिव्यक्तितर्फ ध्यानाकर्षण भएको उल्लेख गर्दै अख्तियारले सोमबार प्रेस विज्ञप्तीमार्फत भनेको छ, माननीय मन्त्रीज्यूको वक्तव्य वास्तविकता र तथ्यलाई बंग्याई आफूअनुकुल भाषा र कानुनको व्याख्या गरी आफूमाथि भएको कारबाहीप्रतिको तत्काल आक्रोशको अभिव्यक्ति दिइ एउटा स्वतन्त्र र निष्पक्ष संवैधानिक निकायलाई लाञ्छित गर्ने अभिप्रयाले प्रेरित रहेको स्पष्ट पारिन्छ ।
अख्तियारको सिफारिसको ओलोचना गर्ने क्रममा मन्त्री पौडलले निर्णय पुर्नविचार गर्न आग्रह गर्दै अन्यथा आफू अदालत जाने सक्ने संकेत गरेका थिए ।
असार १० गते केशवकुमार विष्टलाई राखेप सदस्य सचिव नियुक्त गर्दा कानुनी र नैतिक रुपमा ठिक नभएको भन्दै अख्तियाररले शुक्रबार मन्त्री पौडेललाई कारबाही गर्न प्रधानमन्त्री कोइरालालाई पत्रचार गरेको थियो ।
मन्त्री पौडेलको भनाईको खण्डन गर्दै अख्तियारलले विष्टलाई मन्त्री अध्यक्ष रहेको कार्यसम्पादन तथा व्यवस्थापन समितिको बैठकले इन्चोन एसियाडमा खेलाडी भगाएको भन्दै विष्ट लगायतका पदाधिकारीलाई कारबाही गर्ने सिफारिस गरेअनुसार राखेप र मन्त्रालयले कारबाही गरेको हो । कारबाहीमा परेको संघ वा त्यसका पदाधिकारीलाई खेलकुद गतिविधि सञ्चालन गर्न र कुनै सरकारी सुविधा प्रयोग गर्न पाउने छैनन् भन्ने व्यवस्था राखेपको ऐनमा प्रस्ट भएअनुसार विष्टलाई सदस्य सचिव बनाउनु कानुनी र नैतिक रुपमा गलत देखिएको अख्तियारले निष्कर्ष निकालेको थियो । विष्ट इन्चोन एसियाडमा सेपाताक्रोको व्यवस्थापकका रुपमा सहभागि भएका थिए । सेपाकताक्रोका खेलाडी अमन पोडे कोरियामै लुकेपछि विष्ट विवादमा तानिएका हुन् ।
अख्तियारले त्यस्तो दाबी गरिरहँदा मन्त्री पौडेल र सदस्य सचिव विष्टले त्यति बेलाको कुनै पनि निर्णय कार्यान्वयन नभएको जीकिर गरेका थिए । विष्टले आफुलाई कुनै पनि कारवाही भएको प्रमाणित गरे पदबाट राजीनामा दिने सोही पत्रकार सम्मेलनमा बताएका थिए । मन्त्री पौडेलले राखेपको ऐनको अधिनमा बसी निर्णय गरेको दाबी गरेका थिए ।