काठमाडौं (हाम्रो खेलकुद)– एसियन क्रस कन्ट्रीकी पदक विजेता खेलाडी अन्जु खड्का सडक दुर्घटनामा परि गम्भिर घाइते भएकी छिन् । बौद्ध जोरपाटीमा बिहीबार साँझ ७ः०० बजे मोटरसाइकल दुर्घटनामा परि घाइते भएकी अन्जुको सिनामंगलस्थित काठमाडौं मेडिकल कलेजको आइसियूमा उपचार भइरहेको बताइएको छ ।
बिहीबार नै उनको टाउकोको शल्यक्रिया गरिएको र चिकित्सकका अनुसार अवस्था गम्भिर रहेको एथलेटिक्स परिवारका अध्यक्ष राजन खत्रीले जानकारी दिए । फागुन २३ गते भएको एसियन क्रस कन्ट्री जुनियर महिला (यू २०) मा अन्जु सम्मलित टोलीले रजत पदक जितेको थियो । गत मंसिरमा भएको नेपालगन्ज धारा म्याराथनको हाफ म्याराथनमा अन्जुले तेस्रो स्थान हासिल गरेकी थिइन् ।
नेपाल एथलेटिक्स संघका अध्यक्ष राजीव विक्रम शाहले अन्जुको उपचारमा संघले सक्दो सहयोग गर्ने बताएका छन् । शाहले सरकार र राष्ट्रिय खेलकुद परिषद् (राखेप)बाट अन्जुको उपचारमा सहयोग हुने संघले आशा गरेको बताएका छन् ।
नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले अन्जका विषयमा राखेपका सदस्य सचिवलाई जानकारी दिएको बताएका छन् । ‘आजै सदस्य सचिव रामेछाप जानु भएको छ । मैले अन्जुको अवस्थाका बारेमा जानकारी गराए,’ श्रेष्ठले भने, ‘उनको उपचारका लागि आवश्यक सबै सहयोगका लागि परिषद् तयार छ भन्नुभएको छ ।’
