काठमाडौं (हाम्रो खेलकुद) – नेपाली टोली घरेलु मैदानमा शनिबार सुरु भएको एसिया यू–२० रग्बी सेभेन्सको सेमिफाइनलमा पुग्न सकेन ।

दशरथ रंगशालामा सुरु भएको एसिया रग्बी सेभेन्समा नेपालले खेलका सबै ३ खेलमा हार बेर्होदै सेमिफाइनल पुग्नबाट बन्चित रह्यो । नेपालको समूह ‘बी’ मा थियो । पहिलो खेलमा भारतसँग २८–० ले पराजित भएको नेपाल मलेसियासँगको ४४–० ले गुमाएको थियो ।

समूह चरणको अन्तिम खेलमा नेपाल हङकङसँग ३६–० ले हार बेहोर्यो । नेपालले पाँचौं स्थानका लागि आइतबार उज्बेकिस्तासँग प्रतिस्पर्धा गर्नेछ । सेमिफाइनलमा चाइनिज ताइपेइ र मलेसिया तथा थाइल्यान्ड र हङकङबीच प्रतिस्पर्धा हुनेछ ।

महिलातर्फ डबल राउन्ड रोविनका आधारमा भएको प्रतियोगितामा नेपालको यू–२० महिला टोली पहिलो दिन सबै तीन खेल गुमायो । राउन्ड रोविन लिगपछि प्राप्त अंकको आधार शीर्ष तीन निर्धारण हुनेछ । हङकङसँग को खेल ३४–५ ले पराजित भएको नेपाल अर्को खेलमा मलेसियासँग २४–० ले हार बेहोर्यो । तेस्रो खेलमा नेपाल थाइल्यान्डसँग ४५–० ले पराजित भयो । आइतबार पनि नेपाली महिला टोली तीन खेल खेल्नेछ । प्रतियोगिता आइतबार सम्पन्न हुनेछ ।

युवा तथा खेलकुद मन्त्री डिगबहादुर लिम्बुले प्रतियोगिताको उद्घाटन गरेका थिए । एसिया रग्बीका अध्यक्ष कायस अल धलाई, राष्ट्रिय खेलकुद परिषद्का सदस्यसचिव टंकलाल घिसिङ, नेपाल ओलम्पिक कमिटीका महासचिव निलेन्द्रराज श्रेष्ठ र नेपाल रग्बी संघका अध्यक्ष दीपक देवकोटालगायतको उपस्थिति थियो ।