काठमाडौं (हाम्रो खेलकुद) – खेल पोशाक तथा समाग्री निर्माण कम्पनी लि निङले एसियाली खेलकुद (एसियाड) मा भाग लिने नेपाली म्याराथन धावकद्धय पुष्पा भण्डारी र राजन खत्रीलाई प्रायोजन गरेको छ ।

राष्ट्रिय खेलकुद परिषद् (राखेप) मा बिहीबार कार्यक्रममार्फत खेलाडीलाई लि निङको किट्स हस्तान्तरण गरिएको थियो ।राखेपका निमित्त सदस्य सचिव सम्राट कुसारी, लि निङको नेपालका लागि आधिकारिक बिक्रेता चाइना ट्रेड लिंक प्रालीका प्रबन्ध निर्देशक राजन महर्जन, निर्देशक रमिन महर्जन र नेपाल एथलेटिक्स संघ तदर्थ समितिका सचिव आरके विष्टले खेलाडीलाई किट्स हस्तान्तरण गरे ।

लि निङले पुष्पा र राजनलाई म्याराथनका लागि तयार पारिएको गुणस्तरको जुत्ता र आवश्यक जर्सी उपलब्ध गराएको थियो । एसियाडमा म्याराथन दौडने क्रममा उनीहरुले त्यहि किट्स प्रयोग गर्ने बताइएको छ । पुष्पा र राजनसहित ८ नेपाली खेलाडीले चीनमा जारी एसियाडको एथलेटिक्सका प्रतिस्पर्धा गर्नेछन् । एसियाडको उद्घाटन शनिबार हुनेछ ।

राखेपका निमित्त सदस्य सचिव कुसारीले खेलाडीलाई प्रायोजन गरेकोमा लि निङलाई धन्यवाद दिए । लि निङका प्रबन्ध निर्देशक महर्जनले लामो दुरीको दौडमा नेपालको इतिहास गौरवमय रहेको स्मरण गर्दै एसियाडमा खेलाडीका लागि सफलतलाको शुभकामना दिए ।