काठमाडौं (हाम्रो खेलकुद) – नेपाल ओलम्पिक कमिटी (एनओसी) को विशेष साधारणसभाले एनओसी नेतृत्वको कार्यकाल सम्बन्धि प्रावधानलाई संशोधन गरेको छ । दुई तिहाई सदस्यले अध्यक्ष र महासचिवको कार्यकाल अवधि थपसहित अन्य बुँदा पनि संशोधन गरेको छ ।

एनओसीले अध्यक्ष र महासचिवले अब ४ पटकसम्म उम्मेदवार बन्न पाउने गरी विधान संशोधन गरिएको हो । लगातार अथवा फरक समयमा ४ पटक अध्यक्ष वा महासचिव बन्न मिल्ने विधान अन्तराष्ट्रिय ओलम्पिक काउन्सिल (आइओसी) को चार्टर अनुसार संशोधन गरिएको अध्यक्ष जीवन राम श्रेष्ठले हाम्रो खेलकुद डटकमलाई बताए ।

एनओसीका वर्तमान अध्यक्ष श्रेष्ठको दोस्रो कार्यकाल पूरा भइसकेको छ । यो विधान संशोधनसँगै उनको लागि तेस्रो कार्यकालको लागि उम्मेदवारीको ढोका खुलेको छ ।

२७ सदस्यीय साधारण सभा सदस्यमध्ये विशेष साधारण सभामा २६ सदस्यको उपस्थिति थियो । जहाँ २० सदस्यले विधान संशोधनको पक्षमा मत दिएको श्रेष्ठले बताए । एक सदस्यले तटस्थ र एक सदस्यले विपक्षमा मतदान गर्दा ४ सदस्यले प्रक्रियामा सहभागिता जनाएनन् ।

ट्रायथलनका निलेन्द्रराज श्रेष्ठ, जिम्न्यास्टिकका ध्रुवबहादुर प्रधान, फेन्सिङ सुनिल श्रेष्ठ, हक्कीका उमेशलाल श्रेष्ठले मतदानमा सहभागी भएनन् । भलिबलका मनोरन्जन रमण शर्मा तटस्थ बस्दा फुटबलका दीर्घबहादुर केसी (कुमार) ले विपक्षमा मतदान गरे ।

यस्तै एनओसी कार्यसमितिको उम्मेदवारीको लागि उमेर सम्बन्धि प्रावधान पनि संशोधन भएको छ । पहिले ७० वर्षसम्मको उमेर हद रहेको बुँदा संशोधन गरेर ७५ वर्ष पुर्याएको छ ।

सदस्यताको हकमा भने राष्ट्रिय संघ आबद्धता र सदस्यता कार्यविधि २०८१ पनि पारित गरिएको अध्यक्ष श्रेष्ठले बताए । जसमा एसोसिएट मेम्बरको पनि व्यवस्था रहेको छ । जसको भोटिङ अधिकार हुने छैन । फुल मेम्बरको लागि भने निश्चित प्रावधान पूरा गर्नुपर्नेछ ।

हिजो राष्ट्रिय खेलकुद परिषद् (राखेप) ले उच्च अदालत पाटनको अन्तरिम आदेशलाई आधार मानेर साधारण सभा नगर्न पत्राचार गरेको थियो ।

यो विषयमा अध्यक्ष श्रेष्ठले साधारण सभा आज बिहान ८ बजे सुरू भएर १० बजे सकिएको र राखेपको पत्र १० बजेमात्र प्राप्त गरेको पनि जानकारी दिए । साथै उनले उच्च अदालत पाटनको अन्तरिम आदेश अहिलेसम्म औपचारिक रूपमा प्राप्त नभएको पनि जिकिर गरे ।

यसअघि एनओसीले विधान संशोधनको लागि आइओसीमा अनुमतिको लागि पत्र पठाएको थियो । आईओसीबाट अनुमति प्राप्त भएपछि विशेष साधारण सभाले विधान संशोधन गरेको एनओसीको भनाई छ ।