काठमाडौं (हाम्रो खेलकुद)- अर्को वर्ष कर्णाली प्रदेशमा आयोजना हुने दसौं राष्ट्रिय खेलकुद २०८२ को अफिसियल लोगो र मास्कट सार्वजनिक गरिएको छ।

युवा तथा खेलकुद मन्त्री तेजुलाल चौधरी र राष्ट्रिय खेलकुद परिषद (राखेप) का उपाध्यक्ष ध्रुव आचार्यले आज लोगो र मस्कट सार्वजनिक गरे।

रेड पाण्डा (हाब्रे) दसौंको अफिसियल मास्कटको रुपमा रहनेछ। कर्णाली प्रदेशमा पाईने दुर्लभ जनावर भएकोले रेड पाण्डालाई मस्कट बनाइएको हो।

दसौंको लोगोमा कर्णाली नदी, शान्तिको प्रतिक परेवा, नेपालको हिमाल पहाड र तराई, नेपालको झण्डा, नेपालको सात प्रदेश र खेलाडीहरुलाई समेटेर तयार गरिएको छ।

लोगो र मास्कट दुवै विकास तमखुले बनाएका हुन्। लोगोको लागि उनलाई ५० हजार र मस्कटको लागि २५ हजार रुपैयाँ पारिश्रमिक दिइएको छ।

लोगो र मास्कटको लागि राखेपले विज्ञापन गरेको थियो। ५ जनाले लोगो पठाएपछि परिषदले ३ जनाको लोगो कर्णाली प्रदेश खेलकुद विकास परिषद्लाई पठायो।

तर कर्णालीले लोगो पूर्ण नभएको भन्दै विकास तमखुले बनाएको लोगो र मस्कटलाई राखेपमा पठाएको बताइएको छ। सोही लोगो र मास्कट आज सार्वजनिक गरियो।

सोही अवसरमा राखेपका सदस्य–सचिव टंकलाल घिसिङले दसौं राष्ट्रिय खेलकुदको डेकिकेटेड वेभसाइट सार्वजनिक गरेका थिए ।

राष्ट्रिय खेलकुदमा सहभागी हुने खेलाडी, प्रशिक्षक, व्यवस्थापक, अफिसियललगायतको अनलाइन दर्ता कसरी गर्ने भन्ने विषयमा जानकारी दिन खेलाडी अनलाइन दर्ता सफ्टवेयर भिडियो प्रदर्शन गरिएको थियो ।

राष्ट्रिय खेलकुदको लोगो र मस्कटलगायत विषयवस्तुलाई समेटी तयार पारिएको एनिमेटेड भिडियो पनि प्रदर्शन गरियो ।

मन्त्री चौधरीले राष्ट्रिय खेलकुदलाई लक्षित गरी तयार गरेको उत्कृष्ट पूर्वाधारका लागि कर्णाली प्रदेशलाई धन्यवाद दिए । उनले राष्ट्रिय खेल संघलाई खेलाडी र खेलको हितलाई केन्द्र विन्दुमा राखेर काम गर्न आग्रह गर्दै खेलाडीको प्रतिभा देखाउने चाहनालाई मध्यनजर गरी राष्ट्रिय खेलकुद भव्य बनाउन सबै एकजुट हुनु पर्नेमा जोड दिए ।

उपाध्यक्ष आचार्यले राष्ट्रिय खेलकुदलाई भव्य रुपमा सम्पन्न गर्न आतुर रहेको बताउदै राष्ट्रिय खेलकुद प्रतिभा खोजीको माध्यम पनि भएको बताए ।

सदस्य–सचिव घिसिङले राष्ट्रिय खेलकुदमा सहभागी हुन खेलाडी उत्साहित रहेकाले खेलाडीले खेल्न पाउने वातावरण बनाउन सम्पूर्ण सरोकारवाला सबै एक ढिक्का हुने पर्नेमा जोड दिए । दसौं राष्ट्रिय खेलकुद जेठ ३ देखि १० गतेसम्म हुनेछ ।