काठमाडौं (हाम्रो खेलकुद) – नेपालका युवा ब्याटर रोहित पौडेलले त्रिकोणात्मक टि२० आई सिरिजमा लिगको अन्तिम खेलमा मलेसियाविरुद्ध आफ्नो करिअरको पहिलो अर्धशतक पूरा गरेका छन् । रोहितले ३२ बलमा टि२० आई करिअरको पहिलो अर्धशतक बनाएका हुन् ।

टियु क्रिकेट मैदानमा टस हारेर पहिला ब्याटिङ थालेको नेपालले १३ ओभरमा २ विकेट गुमाउँदै १ सय २९ रन बनाएको छ । रोहित ३२ बलमा ५ चौकासहित ५० रनमा अविजित छन् । दीपेन्द्रसिंह ऐरी २९ बलमा ५ चौकासहित ३९ रनमा अविजित छन् । तेस्रो विकेटका लागि रोहित र दीपेन्द्रले ९३ रनको साझेदारी गरि सकेका छन् ।

तेस्रो ओभरको तेस्रो बलमा ओपनर कुशल भुर्तेल तीव्र गतिका बलर मोहम्मद वाफिकको बलमा १२ रनमा एलबीडल्लू आउट गरे । उनले ८ बलमा २ चौका प्रहार गरे । अर्का ओपनर आसिफ शेख बायाँ हाते स्पिनर पवनदीप सिंहको चौथो ओभरको दोस्रो बलमा मिडअफमा शर्विन मुनीआन्दीबाट १८ रनमा क्याच भए । उनले ९ बलमा ३ चौका प्रहार गरे ।

नेपालले आज एक खेलाडी परिवर्तन गरेको छ । तीव्र गतिका बलर सोमपाल कामीलाई विश्राम दिँदा कमलसिंह ऐरीलाई मैदान उतारेको छ । टोलीमा अन्य भने परिवर्तन छैन ।

मलेसिया यस खेलमा विजयी भएमा फाइनलमा पुग्नेछ । तर पराजित हुँदा भने पपुवा न्युगिनी फाइनलमा पुग्ने समिकरण छ । मलेसिया पराजित हुँदा दुबै टोलीको २–२ अंक हुनेछ । यो अवस्थामा पपुवा न्युगिनी नेटरनरेटमा माथि रहँदै फाइनलमा पुग्नेछ ।

नेपालको प्लेइङ ११ :

सन्दीप लामिछाने (कप्तान), आदिल अन्सारी, कुशल भुर्तेल, कमलसिंह ऐरी, दीपेन्द्रसिंह ऐरी, आसिफ शेख , करण केसी, अभिनाश बोहरा, दीलिप नाथ (विकेटकिपर), आरिफ शेख र रोहित पौडेल ।