एजेन्सी – इंग्लिस प्रिमियर लिग अन्तर्गत म्यानचेस्टर युनाइटेड ब्रेन्टफर्डविरुद्ध जारी खेलको पहिलो हाफमा नै ४-० ले पछि परेको छ । घरेलु टोलीले पाहुना टोलीलाई पहिलो हाफमा दबाबमा राख्दै अप्रत्याशित अग्रता लिएको हो ।

खेलको दशौं मिनेटमा जोस डा सिल्भाले गोल गर्दै घरेलु टोलीलाई अग्रता दिलाए । उनले गरेको प्रहार गोलरक्षक डेविड डे हेयाको हातबाट फुस्कंदा युनाइटेड पछि परेको थियो । १८ औं मिनेटमा माथिअस जेन्सनले युनाइटेडको अग्रता दोब्बर पारे । उनले युनाइटेडको डिफेन्स र गोलरक्षकबीच समन्वय हुन नसक्दा पेनाल्टी क्षेत्रभित्र दबाब दिँदै गोल गरेका थिए ।

३० औं मिनेटमा बेन मीले गोल गर्दै अग्रता ३-० को बनाए । त्यसको ५ मिनेट नबित्दै काउन्टर अट्याकमा अघि बढेको ब्रेन्टफर्डले ४-० को अग्रता बनायो । आइभन टोनीले सिर्जना गरेको मुभलाई ब्रायन एम्बुएमोले वन भर्सेस वनको स्थितिबाट गोलमा परिणत गरे ।

पहिलो खेलमा ब्राइटनसँग २-१ ले पराजित भएको युनाइटेड निकै दबाबमा रहेको छ । उक्त खेलमा क्रिस्टियानो रोनाल्डो बेन्चबाट प्रवेश गरेपछि प्रशिक्षक एरिक टेन हागको आलोचना समेत भएको थियो । आजको खेलमा दोस्रो हाफमा पनि यही गोल अन्तर कायम रहे युनाइटेड अंक तालिकाको पुछारमा नै रहनेछ ।\

यो पनि : म्यानचेस्टर सिटी र आर्सनलको लगातार जित