काठमाडौं (हाम्रो खेलकुद) – नेपालकी १९ वर्षीय बक्सर सुष्मा तामाङ आइबा युथ बक्सिङ च्याम्पियनसिप अन्तर्गत ४५-४८ केजी लाइट फ्लाइवेट समुहको क्वाटरफाइनलमा पराजित भएकी छिन् ।

पोल्यान्डको किएल्चामा जारी प्रतियोगितामा सुष्माले शनिबार लिथुआनियाकी दिया बयालितेलाई पराजित गर्दै अन्तिम ८ मा स्थान बनाएकी थिइन् । सुष्मा यस प्रतियोगितामा जित हासिल गर्ने नेपालकै पहिलो बक्सर समेत बनेकी थिइन् ।

आइतबार भने सुष्मा पोल्यान्डकै नाटालिया कुचेस्कासँग पराजित हुँदै बाहिरीन । सुष्माले तीनै राउन्डमा कडा चुनौती दिएपनि विश्व च्याम्पियनसिपमा पदक जित्ने दावेदारी प्रस्तुत गरेकी कुचेस्कालाई पराजित गर्न सकिनन् ।

सुरुवाती दुवै राउन्डमा सुष्मा पाँचै जजको स्कोरिङमा १०-९ ले पछि परेकी थिइन् । तर अन्तिम राउन्डमा भने चार जजले उनको पक्षमा १०-९ को स्कोर दिएका थिए । समग्रमा उनी ५-० ले पराजित भएपनि चार जजले २९-२८ र एक जजले ३०-२७ को स्कोर दिए ।

पहिलो राउन्डमा नै कुचेस्काको नाकबाट रगत बगेपछि सुष्माले दोस्रो राउन्ड थप आक्रामक बनेकी थिइन् । तर दोस्रो राउन्ड आफ्नो पक्षमा पारेपछि कुचेस्काले तेस्रो राउन्डमा रक्षात्मक रणनीति अपनाउँदै आक्रमणमा जान चाहिनन् । तीनै राउन्डमा सुष्माको प्रदर्शन भने प्रशंसनीय रहयो ।

सुष्माले दुई वर्षअघि आठौं राष्ट्रिय खेलकुदमा स्वर्ण जितेपछि लेखिएको सामग्री : १७ वर्षमै ‘राष्ट्रिय च्याम्पियन’