काठमाडौं (हाम्रो खेलकुद) – क्रिकेट खेलाडी संघ नेपाल (सिप्यान) ले नेपाल क्रिकेट संघ (क्यान) चार खेलाडीबीचको पछिल्लो विवाद बारे ध्यानाकर्षण जनाएको छ । सिप्यानका महासचिव पारस खड्का र अध्यक्ष मनिषराज पाण्डेले संयुक्त रुपमा प्रेस विज्ञप्ति जारी गर्दै खेलाडी र क्यान विवादबारे ध्यानाकर्षण भएको जनाएको छ ।

‘खेलाडीहरुले आफ्नो भावना तथा आवाजहरु अगाडि राख्न खोज्दा उक्त मागहरु उचितरुपमा सम्बोधन गर्नुको सट्टा खेलाडीमाथि नै गरेको कारबाहीले क्रिकेट विकासमा अवरोध पुग्ने सिर्जना भएको छ । वर्गीकरण जस्तो महत्वपूर्ण विषयवस्तुलाई पारदर्शीरुपमा निश्चित मापदण्ड तोकेर अवलम्बन गर्नुपर्छ’, विज्ञप्तिमा भनिएको छ । त्यसैमा थपिएको छ, वर्गीकरण त्रुटिरहित बनाउन तथ्यपरक, वस्तुपरक र वैज्ञानिक बनाइनुपर्ने आवश्यकता पुन : दोहोर्याउन आवश्यक देखिन्छ ।’

सिप्यानले क्यान र खेलाडीबीचको तिक्तता मेटाई नेपाली क्रिकेटको भलो हुने कदम उठाउन आग्रह गरेको छ । पूर्व कप्तान ज्ञानेन्द्र मल्ल, दीपेन्द्रसिंह ऐरी, तीव्र गतिका बलर सोमपाल कामी र कमलसिंह ऐरी क्यानको २०२१ अन्तिम ६ महिना ग्रेडबारे एक मिडियामा गएर बोलेको भन्दै कारबाही गरेको थियो ।

क्यानले त्यसपछि दुई पटक स्पष्टीकरण सोधेपनि चित्त बुझ्दो जवाफ नआएपछि र खेलाडीहरुले नै उल्टै ११ बुदे माग राख्दै पत्र लेखेपछि अन्तिममा क्यानले अनुशासन देखाउँदै कारबाही गरेको थियो । ज्ञानेन्द्रको कप्तान र दीपेन्द्रको उपकप्तान पद खोसेको थियो । यी दुई खेलाडीसँगै सोमपाल र कमललाई २०२२ को सुरुवाती ६ महिना ग्रेड मै नराख्ने जनाएको थियो ।