एजेन्सी – भारत र पाकिस्तान युएईमा जारी यु १९ एसिया कपको फाइनलमा पुगेका छन्।

दुबैले सेमिफाइनलमा प्रभावशाली प्रदर्शन गर्दै फाइनलको यात्रा तय गरेका हुन्। आज भारतले श्रीलंका र पाकिस्तानले बंगलादेशलाई समान ८ विकेटले हराउँदै एकअर्कासँगको भेट पक्का गरेका हुन्।

आइतवार हुने फाइनलमा फेरि एकपटक भारत र पाकिस्तानबीच प्रतिस्पर्धा हुनेछ। एउटै समूहबाट भारत विजेता र पाकिस्तान उपविजेताका रुपमा सेमिफाइनलमा पुगेका थिए।

दुबईको आईसीसी एकेडेमी ‘ए’ मैदान मा आज वर्षाले प्रभावित सेमिफाइनलमा भारतले श्रीलंकालाई १८ ओभरमै १ सय ३९ रनको लक्ष्य पछ्याउँदै २ विकेट गुमाउँदै सहज जित निकाल्यो।

भारतका कप्तान आयुष म्हात्रे र ओपनर वैभव सूर्यवंशी सुरुमै आउट भए पनि विहान मल्होत्रा र आरोन जर्ज ले उत्कृष्ट ब्याटिङ गरे। दुवैले अर्धशतक प्रहार गर्दै अविजित १ सय १४ रनको साझेदारी गरे ।

त्यसअघि २० ओभरमा सीमित खेलमा श्रीलंकाले ८ विकेटमा ८ विकेटको नोक्सानीमा १ सय ३८ रन बनाएको थियो। श्रीलंका एक समयमा ६ विकेट गुमाएर ८४ रन जोड्दै संकटमा परेको थियो।

चामिका हीनतिगाला र सेथ्मिका सेनेविरत्ने बीचको सातौँ विकेटका लागि ४० बलमा ५२ रनको साझेदारी गरे। तर त्यो स्कोर भारतका लागि चुनौतीपूर्ण बन्न सकेन।

अर्को सेमिफाइनलमा पाकिस्तानले बंगलादेशलाई ८ विकेटले पराजित गर्दै फाइनलमा स्थान बनायो। वर्षाका कारण २७ ओभरमा घटाइएको खेलमा बंगलादेश १ सय २१ रनमै अलआउट भयो।

त्यसपछि पाकिस्तानले ६३ बल बाँकी रहँदै २ विकेट गुमाएर १ सय २२ रनको लक्ष्य पूरा गर्‍यो। पाकिस्तानी ओपनर समिर मिनहासले नटआउट अर्धशतक पूरा गरे। ५७ बल खेलेका उनले ६ चौका र २ छक्कासहित ६९ रन बनाए।

दुबईमा वर्षा र भिजेको आउटफिल्डका कारण दुबै सेमिफाइनल खेल प्रभावित भएका थिए। तर मौसम सुधारिएपछि खेल सम्भव भयो।

समूह चरणमा भारतले पाकिस्तानलाई हराएको थियो। नेपाल भने समूह चरणमा बंगलादेश, श्रीलंका र अफगानिस्तानसँग पराजित भएको थियो।