एजेन्सी – नेपाली लेगस्पिनर सन्दीप लामिछानेले बिग ब्यास लिग २०२१/२२ मा आफ्नो पूर्व टोली मेलबर्न स्टार्सविरुद्ध कमजोर प्रदर्शन गरेका छन् । १ सय ८१ रनको विजयी लक्ष्य पछ्याएको मेलबर्नले १५ ओभरमा ४ विकेट गुमाउँदै १ सय १६ रन बनाएको छ । मेलबर्नका विकेटकिपर जो क्लार्क ५२ रनमा आउट भए । आन्द्रे रसेल तीन रनमा खेलि रहेका छन् ।

लेग स्पिनर सन्दीप लामिछानेले ४ ओभरमा ३२ रन खर्चेपनि विकेट लिन सकेनन् । त्यसअघि टस जितेर पहिला ब्याटिङ थालेको होबार्ट हरिकेन्सले निर्धारित २० ओभरमा ६ विकेट गुमाउँदै १ सय ८० रन बनाएको थियो ।

होबार्टका ओपनर बेन म्याकडेरमोटले ४३ बलमा ४ चौका र ४ छक्का सहित सर्वाधिक ६७ रन बनाए । कप्तान म्याथ्यु वेड ३९, डार्सी शर्ट २६ र टिम डेविडले २२ रन जोडे । मेलबर्न स्टार्सका आन्द्रे रसेलले ४ ओभरमा ४८ रन खर्चेर ३ विकेट लिए । नाथन कुल्टर नाइलले २ विकेट लिए ।

सन्दीपको चार ओभर

सन्दीपलाई होबार्टले पाँचौं ओभरमा बलिङमा ल्याएको थियो । सन्दीपले आफ्नो पहिलो ओभरमा मात्र तीन रन खर्चिदै उत्कृष्ट सुरुवात गरे । पहिलो बल अष्ट्रेलियाका स्टार अलराउन्डर मार्कस स्टोइनिसलाई एक रन दिएका सन्दीपले त्यसपछि दोस्रो र तेस्रो बल जो क्लार्कलाई डट राखे । चौथो बलमा एक रन, पाँचौं बलमा डट र अन्तिम बलमा एक रन खर्चिए ।

सातौं ओभरमा सन्दीपले सात रन खर्चिए । ग्लेन म्याक्सवेललाई पहिलो र जो क्लार्कलाई दोस्रो बलमा एक रन रन खर्चिए । तेस्रो बलमा एन, चौथो बलमा दुई, पाँचौं र छैटौं बलमा सन्दीपले एक एक रन खर्चिएका थिए ।

दशौं ओभरमा भने सन्दीप महँगो सावित हुँदै १९ रन खर्चिए । पहिलो बलमै क्लार्कले सन्दीपलाई डिप मिडविकेटमा छक्का प्रहार गरेका थिए । दोस्रो र तेस्रो बलमा एक एक रन खर्चिए । चौथो बलमा क्लार्कले मिडविकेटमा चौका प्रहार गरेका थिए । अर्को बलमा डिप विकेटमा छक्का प्रहार गरेपछि सन्दीप महँगो सावित बनेका थिए । अन्तिम बलमा एक रन लिँदै स्ट्राइक हातमा राखे ।

१५ औं ओभरको पहिलो बलमा सन्दीपले आन्द्रे रसेललाई एक रन दिए । दोस्रो बलमा हिल्टन कार्टराइटलाई डट र तेस्रो बलमा एक रन दिए । चौथो बलमा रसेललाई डट राख्दा पाँचौं बलमा दुई रन र अन्तिम बलमा डट राख्दै स्पेल सकाए ।

जारी बिग ब्यासमा सन्दीप पाँच खेल मध्य तेस्रोमा विकेट विहीन बनेका हुन् । पहिलो खेलमा सिड्नी सिक्सर्ससँग १ विकेट लिएका थिए । सन्दीप दोस्रो खेलमा सिक्सर्ससँगनै विकेट विहीन बनेका थिए । तेस्रो खेलमा पर्थ स्कोचर्ससँग १ विकेट लिएका थिए । चौथो खेलमा पर्थ स्कोचर्सविरुद्ध ४ ओभरमा ३९ रन खर्चेपनि विकेट लिन सकेका थिएनन् । सुरुवाती पाँच खेलमा सन्दीपको प्रदर्शन खराब छ ।