काठमाडौं (हाम्रो खेलकुद) – एसिसी यू-१९ एसिया कपमा बंगलादेशले प्रस्तुत गरेको विशाल विजयी लक्ष्य पछ्याएको नेपालले खराब सुरुवात गरेको छ । जितको लागि २ सय ९८ रनको विजयी लक्ष्य पछ्याएको नेपालले सुरुवाती १५ ओभरमा ३ विकेट गुमाउँदै ४६ रन बनाएको छ ।

नेपालका अर्जुन साउद २४ बलमा २ चौका सहित १४ रनमा अविजित छन् । अर्जुनलाई विवेक रानामगरले ९ रनमा साथ दिएका छन् ।
दोस्रो ओभरको चौथो बलमा मोहम्मद तान्जिम हसनले ओपनर अर्जुन कुमाललाई पाँच रनमा बोल्ड आउट गरे । हसन ले नै आठौं ओभरको पहिलो बलमा कप्तान तथा नेपालका प्रमुख ब्याटर देव खनाललाई १२ रनमा बोल्ड गरेपछि नेपाल दबाबमा परेको थियो । अर्को ओभरको दोस्रो बलमा कप्तान रकिबुल हसनले सन्तोष कार्कीलाई गाजी मोहम्मद तहजिबुलबाट तीन रनमा स्टम्पिङ आउट भएसँगै नेपाल २३–३ को कमजोर अवस्थामा पुगेको थियो ।

त्यसअघि शारजाह क्रिकेट स्टेडियम युएईमा टस जितेर ब्याटिङ थालेको बंगलादेशले निर्धारित ५० ओभरमा ४ विकेट गुमाउँदै २ सय ९७ रन बनाएको थियो । बंगलादेशका मोहम्मद प्रान्तिक नवरोज नाबिलले १ सय १२ बलमा ११ चौका र १ छक्कासहित १ सय २७ रनको उत्कृष्ट अविजित शतकीय इनिङ खेले । मध्यक्रमका विकेटकिपर मोहम्मद फहिमले ५ ४ बलमा ३ चौका र ३ छक्का सहित ५८ रनमा रिटायर्ट हर्ट आउट भए । चौथो विकेटका लागि प्रान्तिक र फहिमले १ सय बलमा १ सय १७ रनको शतकीय साझेदारी गरेपछि बंगलादेशले बलियो योगफल तयार पारेको थियो ।