एजेन्सी – एसिसी यू१९ एसिया कपमा नेपालले श्रीलंकासँग खेलमा टस हारेर पहिला फिल्डिङ गर्ने भएको छ । शाहजाह क्रिकेट स्टेडियममा श्रीलंका दुनिथ वेललेजले टस जितेर पहिला ब्याटिङ गर्ने निर्णय लिएका छन् ।

नेपालले आजको खेलमा टोलीमा दुई परिवर्तन गरेको छ । तीव्र गतिका बलर दुर्गेश गुप्तालाई बेन्चमा राख्दै स्पिन अलराउन्डर तथा उपकप्तान शेर मल्ललाई टोलीमा मौका दिएको छ । त्यस्तै ओपनर अर्जुन कुमालको स्थानमा बसन्त कार्कीलाई मौका दिएको छ ।

तीव्र गतिका बलर दुर्गेश गुप्ताले ९ ओभरमा ५९ रन खर्चेका थिए । अर्जुन कुमाल ५ रनमा आउट भएका थिए । आजको खेलमा देव खनाल र सन्तोष कार्कीले ओपनिङ गर्नेछन् ।

नेपाल पहिलो खेलमा बंगलादेशसँग १ सय ५४ रनको फराकिलो अन्तरले पराजित भएको थियो । श्रीलंकाले पहिलो खेलमा कुवेतलाई २ सय ७४ रनको फराकिलो अन्तरले पराजित गरेको थियो । टेस्ट टोली श्रीलंका नेपाललाई हराउँदै सेमिफाइनलमा स्थान पक्का गर्न चाहन्छ । शीर्ष दुईमा रहेर सेमिफाइनल खेल्ने सम्भावना जीवितै राख्न नेपालले श्रीलंकालाई हराउँनै पर्ने हुन्छ । नेपाल आजको खेलमा पराजित भएमा प्रतियोगिता समूह चरणबाटै बाहिरिने छ ।

नेपालको प्लेइङ ११ :

देव खनाल (कप्तान), विवेक यादव, गुलशन झा, विवेक रानामगर, सन्तोष कार्की, आदिल अन्सारी, तिलकराज भण्डारी, बसन्त कार्की, बशिर अहमद, शेर मल्ल र अर्जुन साउद ।

हेड टु हेड :

२००८ यता नेपाली यू१९ र श्रीलंका यू१९बीच पाँच खेल भएका छन् । सबै खेलमा नेपाल पराजित भएको थियो । २०१६ को एसिया कप बाहेक अन्य सबै खेलमा नेपालले सहजै हारेको छ । २०१६ मा भने नेपाल एक रनले पराजित भएको छ । दीपेन्द्रसिंह ऐरीले ९० रनको इनिङ खेलेपछि जित नजिक पुगेर पराजित भएको थियो ।

अंक तालिका

पाकिस्तान समूह ए मा २ खेलमा ४ अंकका साथ शीर्ष स्थानमा छ । भारत २ खेलमा १ मा जित र १ मा हार सहित दोस्रो स्थानमा छ । अफगानिस्तान २ खेलमा १ मा जित र १ मा हार सहित तेस्रो स्थानमा छ । युएई २ खेलमा अंक विहीन हुँदै पुछारमा छ । युएई प्रतियोगिताबाट बाहिरी सकेको छ ।

समूह बी मा बंगलादेश २ खेलमा ४ अंकका साथ शीर्षस्थानमा छ । श्रीलंका १ खेलमा २ अंकका साथ दोस्रो स्थानमा छ । कुवेत २ खेलमा अंक विहीन हुँदै तेस्रो र नेपाल १ खेलमा अंक विहीन हुँदै पुछारमा छ । नेपालले आइतबार श्रीलंका र मंगलबार कुवेतसँग खेल्नेछ । शीर्ष दुईमा रहेर सेमिफाइनल खेल्न नेपालले बाँकी दुई खेलमा फराकिलो जित हात पार्नुपर्ने हुन्छ ।