काठमाडौं (हाम्रो खेलकुद) – नेपालले एसिसी यू–१९ एसिया कपमा आफ्नो दोस्रो खेलमा श्रीलंकाविरुद्ध कमजोर बलिङ सुरुवात गरेको छ । शारजाह क्रिकेट मैदानमा टस जितेर पहिला ब्याटिङ थालेको श्रीलंकाले सुरुवाती २० ओभरमा १ विकेट गुमाउँदै ९७ रन बनाएको छ ।

श्रीलंकाका ओपनर चामिदु विक्रमसिंघे ६२ बलमा ४ चौका सहित ४१ रनमा अविजित छन् । सदिशा राजपक्षे ३३ बलमा ३ चौकासहित ३० रनमा अविजित छन् । ओपनर चामिदु र शेभन डेनियलले पहिलो विकेटका लागि १०.१ ओभरमा ३९ रनको साझेदारी गर्दै मध्यम सुरुवात दिलाएका थिए ।

कप्तान देव खनालले डेनियललाई १७ रनमा कट एण्ड बोल्ड आउट गरे । श्रीलंकाविरुद्ध पनि नेपालका प्रमुख बलरले सुरुवाती समय खराब लयलाई निरन्तरता दिएपछि नेपालले अपेक्षा अनुसार सुरुवात गर्न नसकेको हो । सिनियर टोलीबाट खेलि सकेका तीव्र गतिका बलर गुलशन झाले ४ ओभरमा १७ रन र आदिल अन्सारीले समान ओभरमा १३ रन खर्चेका छन् । देव खनालले ५ ओभरमा १ मेडनसहित २२ रन खर्चेर १ विकेट लिएका छन् । शेर मल्लले ४ ओभरमा २७ खर्चेका छन् ।

नेपाल पहिलो खेलमा बंगलादेशसँग १ सय ५४ रनको फराकिलो अन्तरले पराजित भएको थियो । शीर्ष दुईमा रहेर सेमिफाइनल खेल्ने सम्भावना जीवितै राख्न नेपालले श्रीलंकालाई हराउँनै पर्ने हुन्छ । नेपाल आजको खेलमा पराजित भएमा प्रतियोगिता समूह चरणबाटै बाहिरिने छ ।