काठमाडौं (हाम्रो खेलकुद) – नेपाल एपीएफ क्लबले प्रधानमन्त्री कप महिला राष्ट्रिय टि२० क्रिकेट प्रतियोगिताको उपाधि जितेको छ । आइतबार भएको फाइनलमा एपीएफले साविक विजेता प्रदेश नम्बर एकलाई ७ विकेटले हराउँदै च्याम्पियन बनेको हो ।

६८ रनको सामान्य विजयी लक्ष्य पछ्याएको एपीएफले १४.२ ओभरमा ३ विकेट गुमाउँदै पूरा गर्यो । एपीएफको जितमा ओपनर ज्योति पाण्डे ३९ बलमा ६ चौकासहित ३६ रनको अविजित विजयी इनिङ खेलिन् । ममता चौधरी २३ बलमा २ चौका सहित १९ रनमा अविजित रहिन् । ओपनर इन्दु बर्मा ५, रजमती ऐरी शून्य र रोमा थापा ४ रनमा आउट भइन् । प्रदेश एककी कप्तान रुविना क्षेत्रीले ४ ओभरमा १ मेडन सहित १० रन खर्चेर ३ विकेट लिइन् ।

त्यसअघि फाल्पा क्रिकेट मैदानमा टस हारेर पहिला ब्याटिङ थालेको प्रदेश एकले निर्धारित २० ओभरमा ६ विकेट गुमाउँदै ६७ रन बनाएको थियो । एपीएफकी रुविना क्षेत्रीले ४६ बलमा ३ चौकासहित सर्वाधिक ३४ रनको योगदान दिइन् । काजल श्रेष्ठ ४ र अप्सरी बेगम ११ रन बनाए । एपीएफकी सीता रानामगरले ४ ओभरमा १२ रन खर्चेर ३ विकेट लिइन् ।

रेखा रावलले २ र करुणा भण्डारीले १ विकेट लिइन् । गतवर्ष प्रदेश एक ले एपीएफलाई ६ रनले हराउँदै उपाधि जितेको थियो । प्रतियोगिता विजेता एपीएफले ५ लाख र उपविजेता प्रदेश एकले ३ लाख प्राप्त गर्ने छन् ।