काठमाडौं(हाम्रो खेलकुद) – एसिसी यू-१९ एसिया कपमा श्रीलंकाले प्रस्तुत गरेको विशाल विजयी लक्ष्य पछ्याएको नेपालले राम्रो सुरुवात पछि दुबै ओपनरलाई गुमाएको छ ।

३ सय २३ रनको विशाल विजयी लक्ष्य पछ्याएको नेपालले २० ओभरमा २ विकेट गुमाउँदै ८५ रन बनाएको छ । कप्तान देव खनाल ४५ बलमा ४ चौकासहित २८ रनमा क्याच आउट भए । अर्जुन साउद २७ बलमा १४ र वसन्त कार्की १४ बलमा १ रनमा अविजित छन् । ओपनर सन्तोष कार्की ३४ बलमा ४ चौका र १ छक्कासहित ३४ रन जोड्दै आउट भए ।

ओपनर देव खनाल र सन्तोष कार्कीले ११ ओभरमा ५९ रनको साझेदारी गर्दै राम्रो सुरुवात दिलाएका थिए । सन्तोष माथिशा पाथिरानाको बलमा बोल्ड आउट हुन पुगेका थिए । १७ औं ओभरको तेस्रो बलमा देवलाई रविन डि सिल्भाले सदिशा राजपक्षेबाट क्याच आउट गराए ।

त्यसअघि शारजाह क्रिकेट मैदानमा टस जितेर पहिला ब्याटिङ थालेको श्रीलंकाले निर्धारित ५० ओभरमा ४ विकेट गुमाउँदै ३ सय २२ रन बनाएको थियो । श्रीलंकाका तेस्रो नम्बरका ब्याटर सदिशा राजपक्षेले १ सय १९ बलमा ११ चौका र २ छक्का सहित १ सय ३१ रनको उत्कृष्ट शतकीय इनिङ खेले ।

ओपनर चामिन्दु विक्रमसिंघे १ सय २६ बलमा ८ चौका र २ सहित १ सय ११ रनको शतकीय इनिङ खेले । दोस्रो विकेटका लागि चामिन्दु र सदिशाले १ सय ९७ बलमा २ सय २३ रनको उत्कृष्ट दोहोरो शतकीय साझेदारी गरेपछि नेपाली बलर श्रीलंका ब्याटर सामू निरीह बनेका थिए । नेपालका मोहम्मद आदिल अन्सारीले ९ ओभरमा ४६ रन खर्चेर २ विकेट लिए ।