एजेन्सी – विकेटकिपर ऋषभ पन्तको आक्रामक ब्याटिङको सहयोगमा भारतले दोस्रो ओडिआई खेलमा घरेलु टोली दक्षिण अफ्रिकालाई २ सय ८८ रनको प्रतिस्पर्धात्मक लक्ष्य दिएको छ ।

बोल्यान्ड पार्क पार्लमा टस जितेर पहिला ब्याटिङ रोजेको भारतले निर्धारित ५० ओभरमा ६ विकेट गुमाउँदै २ सय ८७ रन बनायो । भारतका विकेटकिपर ऋषभ पन्तले ७१ बलमा १० चौका र २ छक्कासहित सर्वाधिक ८५ रनको योगदान दिए । शार्दुल ठाकुर ३८ बलमा ३ चौका र १ छक्कासहित ४० रनमा अविजित रहे । रविचन्द्रन आश्विन २४ बलमा १ चौका र १ छक्कासहित २५ रनमा अविजित रहे ।

भारतलाई ओपनर शिखर धवन र लोकेश राहुलले ११.४ ओभरमा ६३ रनको साझेदारी गर्दै राम्रो सुरुवात दिलाएका थिए । एडेन माक्ररमले धवनलाई २९ रनमा क्याच गराउँदै पहिलो सफलता दिलाएका थिए । धवनले ३८ बलमा ५ चौका प्रहार गरे । स्पिनर केशव महाराजको बलमा विराट कोहली कभरमा कप्तान टेम्बा बभुमाबाट डक आउट भएका थिए ।

कप्तान लोकेश राहुल ७९ बलमा ४ चौकासहित ५५ रनमा क्याच आउट भए । श्रेयस ऐर ११ र वेंकटेश ऐर २२ रनमा आउट भए । दक्षिण अफ्रिका तबरेज शाम्सीले सर्वाधिक २ विकेट लिए । सिसान्दा मगला, एडेन माक्ररम, केशव महाराज र एन्डिले फेहलुकवयोले १–१ विकेट लिए । तीन ओडिआई खेलको सिरिजमा दक्षिण अफ्रिकाले १–० को अग्रता लिएको छ ।