एजेन्सी – इंग्ल्यान्डका स्टार अलराउन्डर बेन स्टोक्स र अष्ट्रेलिया तीव्र गतिका बलर मिचेल स्टार्क सहित विश्व क्रिकेटका ८ स्टार खेलाडीले इन्डियन प्रिमियर लिग (आइपिएल) २०२२ नखेल्ने निर्णय लिएका छन् ।

आइपिएल २०२२ को मेगा अक्सनमा ३ सय १८ विदेशी खेलाडीले नाम दर्ता गर्दा स्टोक्स सहितका खेलाडी भने छैनन् । स्टोक्स, स्टार्कसँगै तीव्र गतिका बलर जोफ्रा आर्चर, क्रिस वोक्स, शीर्षक्रमका ब्याटर जो रुट, वेस्टइन्डिजका आक्रामक ब्याटर क्रिस गेल , इंग्ल्यान्डका टम करन र साम करन दाजुभाइले पनि अक्सनमा आफ्नो नाम दिएका छैनन् । यी खेलाडीले अन्तर्राष्ट्रिय क्रिकेटलाई मध्यनजर गर्दै मेगा अक्सनमा आफ्नो नाम नदिएको बुझिएको छ ।

यसै साता इंग्ल्यान्डले एसेज सिरिजमा अष्ट्रेलियासँग लज्जास्पद ४–० को हारपछि बेन स्टोक्सले आफू आइपिएल नभएर काउन्टी च्याम्पियनसिप खेल्ने बताएका थिए । साम करन र आर्चर भने चोटबाट अन्तर्राष्ट्रिय क्रिकेटमा पूनरागमन गर्ने प्रयासमा छन् । इंग्ल्यान्डका खेलाडी घरेलु प्रतियोगिता र सिजनमा केन्द्रित रहेको बुझिएको छ ।

अष्ट्रेलिया तीव्र गतिका बलर स्टार्कले २०१५ पछि आइपिएल खेलेका छैनन् । उनले पछिल्ला केहि सिजनमा अक्सनमै आफ्नो नाम दिएका छैनन् । रुटले भने अक्सनमा नाम दर्ता गराउँदैनन् । स्टोक्स र आर्चर राजस्था रोयल्सबाट आइपिएल खेलेका थिए । गत सिजन आर्चरले चोटका कारण आइपिएल खेलेका थिएनन् । बेन स्टोक्सले गत सिजनमा एक मात्र खेल खेलेका थिए । चोटका कारण पहिलो खेलपछि उनले खेलेका थिएनन् । बेन स्टोक्सलाई १२ करोड ५० लाख भारुमा अनुबन्ध गरेको थियो । आर्चरले ७ करोड २० लाख भारु एक सिजनको पारिश्रमिक पाउँदै आएका थिए ।

क्रिस गेल आइपिएल इतिहासकै एक उत्कृष्ट र सफल ब्याटर हुन् । आइपिएल सुरुवाती सिजन २०८८ देखि खेल्दै आएका थिए । ४२ वर्षिय क्रिस गेल खेलाडी जीवनको अन्तिम समयमा छन् । पछिल्ला सिजनहरु गेलले पन्जाब किंग्सबाट २ करोड भारुमा खेल्दै आएका थिए ।

गेलले १ सय ४२ आइपिएल खेलमा ६ शतक र ३१ अर्धशतक सहित ४ हजार ९ सय ६५ रन बनाएका छन् । गेलले २०१३ मा बेंगलोरबाट राइजिङ पुणे सुपर जाइन्ट विरुद्ध एकै खेलमा १ सय ७५ रनको इनिङ खेलेका थिए । जुन टि२० इतिहासकै सर्वाधिक रन हो । साम करन चेन्नईबाट पछिल्ला दुई सिजन खेलेका थिए । टम करन दिल्ली क्यापिटल्सबाट पछिल्लो सिजन खेलेका थिए ।

यसै वर्ष अष्ट्रेलियामा अक्टोबर नोभेम्बरमा टि२० विश्वकप हुँदैछ । आइपिएल अप्रिल-मे मा हुनेछ । फिटनेस र टि२० विश्वकपको कारण केहि स्टार खेलाडीले पछि नाम फिर्ता लिन सक्ने सम्भावना पनि छ । अष्ट्रेलिया टेस्ट कप्तान प्याट कमिन्स, जोश हेजलवुड, डेविड वार्नर, स्टिभ स्मिथ, दक्षिण अफ्रिका क्विन्टन डि कक, फाफ डु प्लेसिस, कागिसो रबाडा लगायतका खेलाडीले आफ्नो मूल्य न्युनतम २ करोड भारु तोकेका छन् ।

भारतीय रविचन्द्रन आश्विन, युजभेन्द्र चहल, दीपक चाहर, शिखर धवन, श्रेयस ऐर, ईशान किशन, सुरेश रैना, अम्बाति रायुडू, मोहम्मद शामी, शार्दुल ठाकुर र देवदत्त पाडिक्कल लगायतका खेलाडीले आफ्नो न्यूनतम मूल्य दुई करोड भारु तोकेका छन् ।

आइपिएलमा एक टोलीले बढीमा २५ खेलाडी राख्न पाउँछन् । बढीमा ८ मात्र विदेशी खेलाडी राख्न पाइने छ । सबै फ्रेन्चाइजले कम्तिमा एक एक विदेशी खेलाडी टोलीमा राखि सकेका छन् । यो अवस्थामा अक्सनमा ७० विदेशी खेलाडी विक्नेछन् । जसमा विश्वका स्टार खेलाडी सहभागी हुनेछन् ।

यदि कुनै फ्रेन्चाइज टोलीले खेलाडीको नाम दर्ता गराउनु परेको खण्डमा २५ जनवरी सम्म गराउन सक्नेछन् । २८ जनवरीमा अक्सनमा जाने खेलाडीको नाम फाइनल हुनेछ । अक्सनमा १ हजार २ सय १४ खेलाडीले नाम दर्ता गराएका छन् । जसमा ८ सय ९६ भारतीय र ३ सय १८ विदेशी खेलाडी छन् ।

कुल खेलाडीमा २ सय ७० क्याप्ड (राष्ट्रिय टोलीबाट खेलेको) , ९ सय ३ अनक्याप्ड र ४१ एसोसियट देशबाट छन् । एसोसियटमा सर्वाधिक धेरै नेपालबाट १५ खेलाडी छन् । उक्त १५ खेलाडी मध्य सर्ट लिस्टमा पर्ने खेलाडी मेगा अक्सनमा जानेछन् । यस सिजनदेखि १० टोली हुने हुँदा सन्दीप सहित केहि नेपाली खेलाडीको सम्भावना पनि रहन्छ ।