एजेन्सी – घरेलु टोली दक्षिण अफ्रिकाले भारतसँगको तीन ओडिआई खेलको सिरिजमा क्लिनस्विप गरेको छ । दक्षिण अफ्रिकाले तेस्रो तथा अन्तिम ओडिआई खेलमा भारतमाथि चार रनको रोमान्चक जितका साथ क्लिनस्विप गरेको हो ।

२ सय ८८ रनको विजयी लक्ष्य पछ्याएको भारत ४९.२ ओभरमा २ सय ८३ रनमा अल आउट भयो । भारतका विराट कोहलीले ८४ बलमा ५ चौकासहित सर्वाधिक ६५ रन बनाए । ओपनर शिखर धवन ७३ बलमा ५ चौका र १ छक्कासहित ६१ रनमा क्याच आउट भए ।

तल्लोक्रमका तीव्र गतिका बलर दीपक चाहरले ३४ बलमा ५ चौका र २ छक्कासहित ५४ रन जोड्दै भारतलाई जित नजिक पुर्याएका थिए । अन्तिम १८ बलमा भारतलाई जितको लागि १० रन चाहिँएको थियो । तर लुन्गी एनगिडीको १८ औं ओभरको पहिलो बलमा चाहर ड्वेन प्रेटोरियसबाट क्याच भएपछि भारतको जितको सम्भावना टाढिएको थियो ।

ओपनर तथा कप्तान लोकेश राहुल लुन्गी एनगिडीको बलमा जानेमान मलानबाट ९ रन मै क्याच भएका थिए । तर दोस्रो विकेटका लागि धवन र कोहलीले ९८ रनको साझेदारी गर्दै इनिङ सम्हाल्लेका थिए ।

त्यसपछि ब्याटर सम्हाल्लिन नसक्दा भारत पराजित भएको हो । धवन एन्डिले फेहलुक्वायोको बलमा विकेटकिपर क्विन्टन डि ककबाट क्याच भए । यसै ओभरको अन्तिम बलमा ठूलो सट खेलेका पन्त सिसान्डा मगलाबाट क्याच भएपछि गोल्डेन डक पेभेलिएन फर्के ।

स्पिनर केशव महाराजको बलमा कोहली टेम्बा बभुमाबाट क्याच भएपछि भारत समस्यामा परेको थियो । सूर्यकुमार यादव ३२ बलमा ४ चौका र १ छक्कासहित ३९ रनमा क्याच आउट भए । श्रेयस ऐर ३४ बलमा २ चौकासहित २६ रनमा आउट भए ।

दक्षिण अफ्रिका एन्डिले फेहलुक्वायोले ७ ओभरमा ४० रन खर्चेर ३ विकेट लिए । लुन्गी एनगिडीले १० ओभरमा ५८ रन खर्चेर ३ विकेट लिए । ड्वेन प्रेटिरियसले २, सिसान्डा मगला र केशव महाराजले १–१ विकेट लिए ।

त्यसअघि केप टाउनमा टस हारेर ब्याटिङ थालेको दक्षिण अफ्रिका ४९.५ ओभरमा २ सय ८७ रनमा अल आउट भएको थियो । दक्षिण अफ्रिका क्विन्टन डि ककले १ सय ३० बलमा १२ चौका र २ छक्कासहित सर्वाधिक १ सय २४ रनको शतकीय योगदान दिए । डि ककको ओडिआई करिअरको १७ औं शतक हो ।

रास्सी भान डर डुसेनले ५९ बलमा ४ चौका र १ छक्कासहित ५२ रनमा आउट भए । एक समय ७०–३ को कमजोर अवस्थामा पुगेको दक्षिण अफ्रिकालाई चौथो विकेटका लागि डि कक र डुसेनले १ सय ४४ रनको शतकीय साझेदारी गर्दै बलियो योगफलमा पुर्याएका थिए ।

तीव्र गतिका बलर दीपक चाहरले ओपनर जानेमान मलानलाई एक रनमै विकेटकिपर ऋषभ पन्तबाट क्याच गराए । कप्तान टेम्बा बभुमा ८ रनमा रन आउट भए । डेविड मिलर ३९ बलमा ३ चौका र १ छक्कासहित ३८ रनमा आउट भए ।

भारतका प्रसिद्ध कृष्णाले ९.५ ओभरमा ५९ रन खर्चेर सर्वाधिक ३ विकेट लिए । दीपक चाहर र जस्प्रित बुमराहले २–२ विकेट लिए । युजभेन्द्र चहलको नाममा १ विकेट रह्यो ।

दक्षिण अफ्रिका पहिलो ओडिआई खेलमा ३१ रन र दोस्रो खेलमा ७ विकेटले विजयी भएको थियो । भारतसँगको तीन टेस्ट सिरिज घरेलु टोली दक्षिण अफ्रिकाले २-१ ले जितेको थियो ।

दक्षिण अफ्रिकाले अव न्युजिल्यान्डसँग दुई टेस्ट खेलको सिरिज खेल्नेछ । पहिलो टेस्ट १७ फेब्रुअरीदेखि सुरु हुनेछ । भारत र वेस्टइन्डिजबीच समान तीन ओडिआई र टि२० आई सिरिज हुनेछ । पहिलो ओडिआई खेल ६ फेब्रुअरीमा अहमदाबादमा हुनेछ ।