एजेन्सी – स्पिन अलराउन्डर मोईन अलीको अलराउन्ड प्रदर्शनमा इंग्ल्यान्डले वेस्टइन्डिजसँगको दोस्रो टि२० आई खेलमा एक रनको रोमान्चक जित हात पारेको छ । योसँगै पाँच टि२० आई खेलको सिरिज १–१ को बराबरीमा पुगेको छ ।
१ सय ७२ रनको विजयी लक्ष्य पछ्याएको वेस्टइन्डिजले निर्धारित२० ओभरमा ८ विकेट गुमाउँदै १ सय ७० रन बनायो । वेस्टइन्डिजका स्पिनर अकिल हुसेनले १६ बलमा ३ चौका र ४ छक्कासहित ४४ रनको अविजित इनिङ खेलेपनि टोलीको हार टार्न सकेनन् ।
वेस्टइन्डिजलाई जितको लागि अन्तिम ६ बलमा ३० रन चाहिँएको थियो । अकिलले तीव्र गतिका बलर सकिव महम्मदलाई दुई चौका र तीन छक्का प्रहार गर्दै २८ रन जोडेपछि खेल रोमान्चक बनेको थियो । अन्तिम तीन बलमा अकिलले लगातार तीन छक्का प्रहार गरेका थिए । दोस्रो र तेस्रो बलमा लगातार चौका प्रहार गरेका थिए ।
योसँगै अकिल टि२० आईमा १० औं नम्बरमा ब्याटिङ गर्दै सर्वाधिक रन बनाउने ब्याटर बनेका छन् । अकिलले २०१४ नेपाली तीव्र गतिका बलर सोमपाल कामीले हङकङविरुद्ध १० औं नम्बरमा ब्याटिङ गर्दै ४० रन बनाएको कीर्तिमान तोडेका हुन् ।
रोमारियो शेफर्ड २८ बलमा १ चौका र ५ छक्कासहित ४४ रनमा अविजित रहे । नवौं विकेटका लागि शेफर्ड र अकिलले २९ बलमा ७२ रनको अविजित साझेदारी गरेपछि खेल रोमान्चक बनेको थियो । ओपनर ब्रेन्डन किंग शून्य र शाई होप २ रनमा आउट भए । निकोलस पुरन २२ बलमा ३ चौका र १ छक्कासहित २४ र ड्यारेन ब्राभो २३ रनमा आउट भए । कप्तान आइरन पोलार्ड र जेसन होल्डर १–१ रनमा आउट भएपछि वेस्टइन्डिजको जित कठिन बनेको थियो ।
इंग्ल्यान्डका मोईन अलीले ४ ओभरमा २४ रन खर्चेर तीन विकेट लिए । आदिल राशिदले ४ ओभरमा १ मेडनसहित २४ रन खर्चेर २ विकेट लिए । रोस टोपली र क्रिस जोर्डनले १–१ विकेट लिए ।
त्यसअघि टस हारेर ब्याटिङ थालेको इंग्ल्यान्डले निर्धारित २० ओभरमा ८ विकेट गुमाउँदै १ सय ७१ रन बनाएको थियो । इंग्ल्यान्डका ओपनर जेसन रोयले ३१ बलमा ६ चौका र २ छक्कासहित सर्वाधिक ४५ रन बनाए । टम ब्यान्टन २५, जेम्स भिन्स ४, साम विलिंग्स ५ ओईन मोर्गन १३ रनमा आउट भए ।
मोईन अलीले २४ बलमा ३ चौका र १ छक्कासहित ३१ रनमा आउट भए । क्रिस जोर्डनले १५ बलमा २ चौका र १ छक्कासहित २७ रनको योगदान दिए ।
वेस्टइन्डिजका फेबिएन एलेन र जेसन होल्डरले २–२ विकेट लिए । पाँच टि२० आई खेलको सिरिज १–१ को बराबरीमा पुगेको छ । पहिलो खेलमा वेस्टइन्डिज ९ विकेटले विजयी भएको थियो । तेस्रो खेल बुधबार हुनेछ ।
