एजेन्सी – पाकिस्तानका तीव्र गतिका बलर शाहिन शाह अफ्रिदीले दी सर गारफिल्ड सोबर्स ट्रफी फर दी आइसिसी प्लेयर अफ दी इयरको अवार्ड (वर्षको सर्वोत्कृष्ट खेलाडी ) जितेका छन् ।

अफ्रिदीले इंग्ल्यान्डका कप्तान जो रुट, न्युजिल्यान्डका कप्तान केन विलियम्सन र पाकिस्तानका विकेटकिपर ब्याटर मोहम्मद रिजवानलाई पछि पार्दै आइसिसीको वर्ष सर्वोत्कृष्ट खेलाडीको अवार्ड जितेका हुन् ।

२०२१ मा अफ्रिदीले ३६ अन्तर्राष्ट्रिय खेलमा ७८ विकेट लिँदै उत्कृष्ट प्रदर्शन गरेका थिए । अफ्रिदीले टेस्ट र टि२० आईमा यो वर्ष उत्कृष्ट प्रर्दशन गरेका थिए । अक्टोबर नोभेम्बरमा युएईमा भएको टि२० विश्वकपमा पाकिस्तानलाई सेमिफाइनल सम्म पुर्याउन अफ्रिदीले उत्कृष्ट योगदान दिएका थिए ।

पाकिस्तानले सुपर १२ को बी को पहिलो खेलमै चिरपरिचित प्रतिद्धन्द्धी भारतलाई १० विकेटले हराउन अफ्रिदीले उत्कृष्ट बलिङ गरेका थिए । अफ्रिदीले रोहित शर्मा, लोकेश राहुल र विराट कोहलीलाई आउट गर्दै पाकिस्तानलाई जितको आधार तय गरेका थिए । पाकिस्तानले विश्वकप इतिहासमा पहिलो पटक भारतलाई हराउन सफल भएको थियो ।

स्विङ, गति र सटिक योर्करले अफ्रिदीले २०२१ मा उत्कृष्ट प्रदर्शन गरेका थिए । महिलातर्फ उत्कृष्ट खेलाडीको अवार्ड भारतीय ओपनर ब्याटर स्मृति मन्धनाले जितेकी छिन् ।