एजेन्सी – अन्तर्राष्ट्रिय क्रिकेट परिषद् (आइसिसी) ले २०२१ मा प्रदान गर्ने विभिन्न अवार्डमा पाकिस्तानका खेलाडीको बाहुल्यता रहेको छ । आइसिसीले घोषणा गरेको लगभग सबै प्रमुख अवार्डमा पाकिस्तानी खेलाडीले आफ्नो दबदबा राखेका छन् ।

पाकिस्तानका शाहिन शाह अफ्रिदी, कप्तान बाबर आजम र विकेटकिपर मोहम्मद रिजवानले व्यक्तिगत र टिम दुवैतर्फ आफ्नो प्रभुत्व जमाएका छन् । पाकिस्तानका तीव्र गतिका बलर शाहिन शाह अप्रिदीले दी सर गारफिल्ड सोबर्स ट्रफी फर दी आइसिसी प्लेयर अफ दी इयरको अवार्ड (वर्षको सर्वोत्कृष्ट खेलाडी) को अवार्ड जिते । बाबर आजमले पुरुष ओडिआई क्रिकेटर अफ दी इयर अवार्ड जिते । विकेटकिपर रिजवानले पुरुष टि२० आर्ई क्रिकेटर अफ दी इयर अवार्ड जितेका छन् । आइसिसीले प्रदान गर्ने शीर्ष चार ब्यक्तिगत अवार्डमा तीन पाकिस्तानी खेलाडीले जितेका हुन् ।

पुरुष टेस्ट क्रिकेटर अफ दी इयर भने इंग्ल्यान्डका जो रुटले जितेका छन् । इमर्जिङ पुरुष क्रिकेटर अफ दी इयर दक्षिण अफ्रिका जानेमान मलानले जितेका छन् । वर्ष उत्कृष्ट खेलाडी चुनिएका अफ्रिदीले ३६ अन्तर्राष्ट्रिय खेलमा ७६ विकेट लिएका थिए । टि२० विश्वकपमा भारतविरुद्ध प्रदर्शन २०२१ कै एक उत्कृष्ट प्रदर्शन थियो ।

अफ्रिदीको उत्कृष्ट प्रदर्शनको सहयोगमा पाकिस्तानले टि२० विश्वकप इतिहासमा पहिलो पटक भारतलाई हराएको थियो । पाकिस्तानले टि२० विश्वकपमा भारतलाई १० विकेटले हराएको थियो । उक्त खेलमा अफ्रिदीले ४ ओभरमा ३१ रन खर्चेर ३ विकेट लिए । अफ्रिदीले सुरुवातमै रोहित शर्मालाई शून्य र लोकेश राहुललाई तीन रनमा आउट गर्दै उत्कृष्ट सुरुवात दिलाए । विराट कोहलीलाई ५७ रनमा क्याच गराएका थिए । योर्कर र स्विङ बलको सहयोगमा अफ्रिदीले राज गरे । अफ्रिदीले २०२१ मा ९ टेस्ट खेलमा ४७ विकेट लिएका थिए ।

अगष्टमा वेस्टइन्डिजविरुद्ध पहिलो इनिङमा ६ र दोस्रोमा ४ विकेट लिएका थिए । टि२० क्रिकेटरको अवार्ड जितेका रिजवानले २०२१ मा २९ टि२० आई खेलमा १ शतक र १२ अर्धशतक सहित कुल १३ सय २६ रन बनाउँदै जादुमय प्रदर्शन गरे । भारतलाई १० विकेटले हराउनेक्रममा रिजवानले ७९ रनको अविजित इनिङ खेलेका थिए । फेब्रुअरीमा लाहोरमा दक्षिण अफ्रिकाविरुद्ध रिजवानले १ सय ४ रनको शतकीय इनिङ खेलेका थिए । टि२० विश्वकपको सेमिफाइनलमा अष्ट्रेलियाविरुद्ध ६७ रनको इनिङ खेलेका थिए ।

कप्तान बाबरले ओडिआई क्रिकेटर अफ दी इयरको अवार्ड जिते । बाबरले तीनै शैलीमा उच्च प्रदर्शन गरे । बाबरले ६ ओडिआई खेलमा २ शतक र १ अर्धशतक सहित कुल ४ सय ५ रन बनाएका थिए । बाबरले ओडिआईमा इंग्ल्यान्डविरुद्ध जुलाईमा १ सय ५८ रनको इनिङ खेलेका थिए ।

अप्रिलमा दक्षिण अफ्रिकामा पहिलो ओडिआईमा बाबरले १ सय ३ रनको उत्कृष्ट शतकी इनिङमा पाकिस्तान तीन विकेटले विजयी भएको थियो । दक्षिण अफ्रिकाविरुद्ध तेस्रो ओडिआई खेलमा ९४ रनको महत्वपूर्ण इनिङ खेलेका थिए । पाकिस्तानले तीन ओडिआई सिरिज २–१ ले जितेको थियो । बाबर आइसिसीको टि२० र ओडिआई टोलीको पनि कप्तान हुन् ।

जो रुटले १५ टेस्ट खेलमा ६ शतक र ४ अर्धशतकसहित १७ सय ८ रन बनाएका थिए । रुटले गत वर्ष फ्रेब्रुअरीमा चेन्नईमा २ सय १८ रनको उत्कृष्ट दोहोरो शतकीय इनिङ खेलेका थिए । पुरुष तर्फ ब्यक्तिगत अवार्डमा पाकिस्तानका खेलाडीको बाहुल्यता रहँदा भारत र अष्ट्रेलियाबाट शून्य रहे ।

आइसिसी २०२१ को अवार्ड

सर गारफिल्ड सोबर्स ट्रफी फर आइसिसी पुरुष क्रिकेटर अफ द इयर – शाहिन शाह अफ्रिदी (पाकिस्तान)

आइसिसी वुमन्स क्रिकेटर अफ दी इयर – स्मृति मन्धना (भारत)

पुरुष टेस्ट क्रिकेटर अफ दी इयर – जो रुट (इंग्ल्यान्ड)

पुरुष ओडिआई क्रिकेटर अफ दी इयर – बाबर आजम (पाकिस्तान)

महिला ओडिआई क्रिकेटर अफ दी इयर – लिजेल ली (दक्षिण अफ्रिका)

पुरुष टि२० आई क्रिकेटर अफ दी इयर – मोहम्मद रिजवान (पाकिस्तान)

वुमन्स टि२० आई क्रिकेटर अफ दी इयर – ट्यामी ब्यूमन्ट (इंग्ल्यान्ड)

इमर्जिङ पुरुष क्रिकेटर अफ दी इयर – जानेमान मलान (दक्षिण अफ्रिका)

इमर्जिङ महिला क्रिकेटर अफ दी इयर– फतिमा साना (पाकिस्तान)

पुरुष एसोसियट क्रिकेटर अफ दी इयर –जिशान मकशुद (ओमान)

वुमन्स एसोसियट क्रिकेटर अफ दी इयर – आन्द्रे मी जीपेडा (अष्ट्रिया)

अम्पायर अफ द इयर – मारिस इरास्मुस (दक्षिण अफ्रिका)

टिम अफ द इयर

पुरुष टेस्ट टिम अफ २०२१ – दिमुथ करुणारत्ने (श्रीलंका), रोहित शर्मा (भारत), मार्नस लाबुसेन (अष्ट्रेलिया), जो रुट (इंग्ल्यान्ड), केन विलियम्सन (न्युजिल्यान्ड), फवाद आलम (पाकिस्तान), ऋषभ पन्त (भारत/विकेटकिपर), रविचन्द्रन आश्विन (भारत), काइल जेमिसन (न्युजिल्यान्ड), हसन अली (पाकिस्तान) र शाहिन शाह अफ्रिदी (पाकिस्तान) ।

पुरुष ओडिआई टिम अफ २०२१ – पाउल स्टर्लिङ (आयरल्यान्ड), जानेमान मलान (दक्षिण अफ्रिका), बाबर आजम पाकिस्तान/कप्तान ) फखार जमान (पाकिस्तान), रास्सी भान डर डुसेन (दक्षिण अफ्रिका), सकिब अल हसन (बंगलादेश), मुश्फिकुर रहिम (बंगलादेश), वानिन्दु हसंरगा (श्रीलंका), मुश्ताफिजुर रहमान (बंगलादेश), सिमी सिंह (आयरल्यान्ड) र दुश्मन्था चामिरा (श्रीलंका) ।

पुरुष टि२० टिम अफ २०२१ – जस बटलर (इंग्ल्यान्ड), मोहम्मद रिजवान (पाकिस्तान/विकेटकिपर), बाबर आजम (पाकिस्तान÷कप्तान), एडेन माक्ररम (दक्षिण अफ्रिका), मिचेल मार्श (अष्ट्रेलिया), डेविड मिलर (दक्षिण अफ्रिका), वानिन्दु हसरंगा (श्रीलंका), तबरेज शाम्सी (दक्षिण अफ्रिका), जोश हेजलवुड (अष्ट्रेलिया), मुश्ताफिजुर रहमान (बंगलादेश) र शाहिन शाह अफ्रिदी (पाकिस्तान) ।