एजेन्सी – मध्यक्रमका ब्याटर रोभम्यान पोवेलको शतकको सहयोगमा वेस्टइन्डिजले तेस्रो टि२० आई खेलमा इंग्ल्यान्डलाई २० रनले पराजित गरेको । योसँगै पाँच टि२० आई सिरिजमा घरेलु टोली वेस्टइन्डिजले २–१ को अग्रता लिएको छ ।

विहीबार विहान सम्पन्न खेलमा टस हारेर ब्याटिङको निम्तो पाएको वेस्टइन्डिजले निर्धारित २० ओभरमा ५ विकेट गुमाउँदै २ सय २४ रन बनायो । वेस्टइन्डिजका रोभम्यान पोवेलले ५३ बलमा ४ चौका र १० छक्कासहित १ सय ७ रनको शतकीय इनिङ खेले । पोवेल वेस्टइन्डिजबाट टि२० आईमा शतक प्रहार गर्ने तेस्रो खेलाडी हुन् । यसअघि क्रिस गेल र एविन लेविसले शतक प्रहार गरेका थिए ।

युवा विकेटकिपर निकोलस पुरनले ४३ बलमा ४ चौका र ५ छक्कासहित ७० रनको इनिङ खेले । तेस्रो विकेटका लागि पुरन र पोवेलले १ सय २२ रनको शतकीय साझेदारी गरेका थिए । इंग्ल्यान्डका रोस टोपली, जर्ज ग्रेटन, टाइमल मिल्स, लियामलिभिङस्टोन र आदिल राशिदले १–१ विकेट लिए ।

२ सय २५ रनको विशाल विजयी लक्ष्य पछ्याएको इंग्ल्यान्डले निर्धारित २० ओभरमा ९ विकेट गुमाउँदै २ सय ४ रन बनायो । इंग्ल्यान्डका युवा ओपनर टम ब्यान्टनले ३९ बलमा ३ चौका र ६ छक्कासहित सर्वाधिक ७३ रनको योगदान दिए । फिलिप साल्टले २४ बलमा ३ चौका र ५ छक्कासहित ५७ रन बनाए ।

जेसन रोय १९, जेम्स भिन्स १६, लियाम लिभिङस्टोन ११ र कप्तान मोईन अली शून्यमा आउट भए । वेस्टइन्डिजका रोमारियो शेफर्डले ४ ओभरमा ५९ रन खर्चेर ३ विकेट लिए । कप्तान काइरन पोलार्डको नाममा २ विकेट रह्यो ।

पहिलो खेलमा वेस्टइन्डिज ९ विकेटले विजयी हुँदा दोस्रो खेलमा १ रनले पराजित भएको थियो । चौथो टि२० आई खेल आइतबार विहान हुनेछ ।