काठमाडौं (हाम्रो खेलकुद) – तीव्र गतिका बलर सोमपाल कामी, युवा ओपनर आसिफ शेख र कुशल भुर्तेल २०२२ को केन्द्रिय खेलाडी सम्झौता ( ग्रेड) मा बढुवा भएका छन् । नेपाल क्रिकेट संघ (क्यान) को विहीबार सम्पन्न बोर्ड बैठकले जारी गरेको नयाँ २०२२ को ग्रेडमा अलराउन्डर सोमपाल कामी ग्रेड बी बाट ए मा बढुवा भएका हुन् ।

चोटका कारण अर्को महिना हुने आइसिसी टि२० ग्लोबल विश्वकप छनोट ए गुमाएका सोमपाल नयाँ ग्रेडमा ए अटाएका छन् । २०२१ मा नेपालले अप्रिलमा घरेलु मैदानमा नेदरल्यान्ड्स र मलेसियासँग त्रिकोणात्मक टि२० आई सिरिज र सेप्टेम्बरमा आइसिसी विश्वकप लिग-२ अन्तर्गत ओमान र अमेरिकासँग त्रिकोणात्मक ओडिआई तथा पपुवा न्युगिनीसँग दुई ओडिआई खेलको सिरिज खेलेको थियो । सोमपालले त्रिकोणात्मक टि२० आई सिरिजमा ५ खेलमा ५ विकेट लिएका थिए । ओमान भ्रमणमा ६ खेलमा २ विकेट लिएका थिए । २०२१ को अन्तिम ६ महिना ग्रेडमा सोमपाल ग्रेड बी मा थिए ।

त्यस्तै त्रिकोणात्मक टि२० आई र ओमान भ्रमणमा उच्च प्रर्दशन गर्ने आसिफ शेख र कुशल भुर्तेल ग्रेड बी मा बढुवा भएका छन् । कुशलले त्रिकोणात्मक टि२० आई सिरिजमा ५ खेलमा ४ मा अर्धशतक सहित २ सय ७८ रन बनाएका थिए । डेब्यू सुरुवाती तीन खेलमा अर्धशतकका साथ विश्व कीर्तिमान बनाएका थिए । कुशल डेब्यूको सुरुवाती तीन खेलमा टि२० आईमा लगातार अर्धशतक प्रहार गर्ने पहिलो खेलाडी हुन् । ओमान भ्रमणमा कुशलले ६ खेलमा १ अर्धशतक सहित १ सय ४४ रन बनाएका थिए ।

आसिफले ओमान भ्रमणमा ६ खेलमा १ अर्धशतक सहित १ सय ८९ तथा त्रिकोणात्मक टि२० आई सिरिजमा १ सय ५४ रनका साथ उत्कृष्ट प्रभाव छाडेका थिए । युवा अलराउन्डर कुशल मल्ल र सुशान भारी भने ग्रेड बी बाट सी मा झरेका छन् । ओमान भ्रमणमा कुशल मल्लको प्रदर्शन सम्झन लायक थिएन । उनले ५ खेलमा ७ रन मात्र बनाएका थिए । युवा अलराउन्डर आरिफ शेख पनि ग्रेड बी मा बढुवा भएका छन् । ओमान भ्रमणमा आरिफ २ खेलमा ९ रन बनाएका थिए । टि२० आई त्रिकोणात्मक सिरिजमा एक खेलमा मौका पाएपनि ब्याटिङको अवसर पाएका थिएनन् ।

विक्रम सोबले पहिलो पटक ग्रेडमा अट्दै सी मा छन् । विक्रमले ओमान भ्रमणमा नेपालका लागि डेब्यू गर्दै ४ खेलमा ५ विकेट लिएका थिए । ओमान भ्रमणमा उच्च प्रदर्शन गरेका रोहित कुमार पौडेल ग्रेड सी मा छन् । ओमान भ्रमणमा रोहितले ६ खेलमा २ अर्धशतक सहित २ सय १७ रन बनाएका थिए । सन्दीप जोरा भने ग्रेडमै छैनन् । उनी यसअघि ग्रेड सी मा थिए ।

२०२२ को केन्द्रिय खेलाडी सम्झौता

पुरुषतर्फ :

ग्रेड ए :

सन्दीप लामिछाने, ज्ञानेन्द्र मल्ल, दीपेन्द्रसिंह ऐरी, सोमपाल कामी र करण केसी

ग्रेड बी :

कुशल भुर्तेल, आसिफ शेख, शरद भेषावकर, आरिफ शेख, अभिनाश बोहरा, विनोद भण्डारी

ग्रेड सी :

कुशल मल्ल, रोहित कुमार पौडेल, कमलसिंह ऐरी, विक्रम सोब, साहब आलम, सुशान भारी र पवन सर्राफ

महिलातर्फ:

ग्रेड ए :

रुविना क्षेत्री बेलबासे, सीता रानामगर, इन्दु बर्मा, काजल श्रेष्ठ र करुणा भण्डारी

ग्रेड बी :

सरिता मगर, कविता कुँवर, अप्सरी बेगम, सरस्वती चौधरी, सवनम राई र ज्योति पाण्डे

ग्रेड सी :

डली भट्ट, कविता जोशी, संगिता राई, रोमा थापा, अस्मिना कर्माचार्य, ममता चौधरी र विन्दु रावल