काठमाडौं (हाम्रो खेलकुद) – नेपाल क्रिकेट संघ (क्यान) ले जनरल म्यानेजर (महाप्रबन्धक) रौनक मल्लसँग पदअवधि सम्झौता नथप्ने भएको छ । क्रिकेट म्यानेजर विनोद दास र जनरल म्यानेजर रौनक मल्लको एक वर्षको सम्झौता अवधि २०२१ डिसेम्बर अन्तिममा सकिएको थियो ।

बिहीबार भैरहवामा बसेको क्यान बोर्ड बैठकले रौनक मल्लको सम्झौता नविकरण नगर्ने बोर्डबाट निर्णय गरेको छ । विनोद दासको भने क्याने एक वर्ष सम्भौता लम्बाएको छ । क्यानका कार्यवाहक सचिव प्रशान्त विक्रम मल्लले रौनकको सम्झौतान नथप्ने निर्णय बोर्डबाटनै पारित भएको जानकारी दिए ।

‘वहाँको एक वर्षको सम्झौता थियो । हामीले नथप्ने निर्णय गरेका हौं । रौनकको कार्य मूल्याङ्कन सन्तुष्ट नभएपछि सम्झौता नथप्ने निर्णय गरेका हौं, प्रशान्तले भने ।’ उनले त्यसैमा थपे, ‘विनोदको काम त देखिएकोनै छ । उनको सम्झौता थप एक वर्ष थपेका छौं ।’

क्यानले गत पुष २ मा मुख्य प्रशिक्षकमा अष्ट्रेलिया पूर्व ब्याट्सम्यान ह्वाटमोर, म्यानेजरमा विनोद दास र जनलर म्यानेजरमा रौनक मल्ललाई एक वर्षको लागि नियुक्त गरेको थियो । ह्वाटमोरले ब्याटिङमा नयाँ आशा देखाउँदै सम्झौता अवधि तीन महिना बाँकी छदानै गत असोजमा नेपाली क्रिकेटबाट राजीनामा दिएका थिए ।

रौनकले एक वर्ष अवधिमा कुनैपनि देखिने गरि काम गर्न सकेनन् । जनरल म्यानेजरको विशेष गरि प्रायोजक भित्र्याउँदै बोर्डलाई आर्थिक रुपमा बलियो बनाउने काम हुने गर्दछ । तर रौनकले कुनैपनि प्रायोजक नेपाली क्रिकेटमा भित्र्याउन सकेनन् । प्रधानमन्त्री कप राष्ट्रिय प्रतियोगितामानै प्रायोजक ल्याउन नसकेपछि उनको झन चर्को आलोचना हुँदै आएको थियो ।

जसको कारण उनको सम्झौता नथप्ने निर्णय गरेको हो । विनोद दासबाट पनि अपेशा र आशा अनुसार काम भने हुन सकेको छैन । पछिल्लो समय खेलाडी विवाद समाधानमा भने विनोदको ठूलो हात थियो । दासलाई पनि थप उत्कृष्ट कामको लागि दबाब रहने छ । रौनकले मासिक पारिश्रमिक १ लाख १० हजार र विनोद दासले ९५ हजार पाउँदै आएका थिए ।