एजेन्सी – ओमानका शीर्षक्रमका ब्याटिङ अलराउन्डर अकिब इलियासले घरेलु मैदानमा फेब्रुअरी १८ देखि सुरु हुने आइसिसी टि२० विश्वकप ग्लोबल छनोट ए गुमाउने भएका छन् । अकिबले सामाजिक सञ्जालमार्फत आफूले बोन ट्युमरको कारण टि२० विश्वकप गुमाउने जनाएका छन् । योसँगै घरेलु टोली ओमानलाई टि२० विश्वकप छनोटमा ठूलो झड्का लागेको छ ।

‘मैले टि२० विश्वकप सहित आगमी ६–७ महिना क्रिकेट गुमाउने छु । मलाई बोन ट्युमर भएको छ । तर यो क्यान्सर होईन । अझैपनि ट्युमरको शल्यक्रिया गर्नुपर्छ’, अकिब निराश हुँदै लेखेका छन् । ‘ट्युमर शल्यक्रियापछि ठिक हुनेछ । केहि समय विश्रामपछि पूर्ण ठिक हुँदा आगमी प्रतियोगितामा फर्किने छु । यो समय खेलाडीहरुलाई सहज हुँदैन । राम्रो पूनरागमन गर्नेमा आशावादी छु’, उनले लेखेका छन् ।

नेपाल, ओमान, क्यानडा र फिलिपिन्स समूह ए मा छन् । आयरल्यान्ड, युएई, बहराइन र जमर्नी समूह बी मा छन् । फाइनल पुग्ने शीर्ष दुई टोली आगमी अक्टोबर नोभेम्बरमा अष्ट्रेलियामा हुने टि२० विश्वकपको लागि छनोट हुनेछन् । ओमान प्रमुख दाबेदार टोली हो ।

अकिबको सानदार अलराउन्ड प्रदर्शनको सहयोगमा २०२० को फेब्रुअरीमा ओमानले नेपालमा भएको आइसिसी विश्वकप लिग–२ त्रिकोणात्मक सिरिजमा शत प्रतिशत जित निकालेको थियो । सिरिजका ४ खेलमा उनले २ शतक सहित ३ सय २ रन बनाउनुको साथै १० विकेट लिए । पाकिस्तानी मूलका अकीबले सन् २०१५ देखि ओमानबाट खेल्दै आएका छन् । शीर्षक्रमका ब्याट्सम्यान तथा पार्टटाइम स्पिनर अकीब ओमानका प्रमुख खेलाडी हुन् ।

त्रिकोणात्मक सिरिजको पहिलो खेलमा नेपालविरुद्ध अकीबले १ विकेट लिनुको साथै १६ रनमा आउट भएका थिए । दोस्रो खेलमा नेपालले ओमानलाई २ सय ५० रनको लक्ष्य दिएपनि पराजित हुन पुगेको थियो । उक्त लक्ष्य ओमानले मात्र २ विकेटको क्षतिमा १६ बल अगाडीनै पुरा गरेको थियो । त्यो सहज जित दिलाउन अकीब नायक बनेका थिए ।

बलिङमा १० ओभरमा ३६ रन खर्चेर ४ विकेट लिएका उनले ब्याटिङमा अविजित १ सय ९ रन बनाएपछि ८ विकेटले विजयी भएको थियो । १ सय ८ बलमा १२ चौका र १ छक्का प्रहार गर्दै नेपाली समर्थक र खेलाडीलाई घरेलु मैदानमा निराश बनाएका थिए । जुन अकीबको करिअरको उच्च प्रर्दशन थियो ।

अमेरिकाविरुद्ध पहिलो खेलमा २ विकेट लिनुको साथै ७२ रन जोड्दै अलराउन्डर प्रर्दशन गरेका थिए । उनले अमेरिकाविरुद्ध दोस्रो खेलमा १ सय ५ रनको शतकीय इनिङका साथै ३ विकेट लिँदै सहज जित पक्का गराएका थिए ।

अकिबले ओमानबाट १७ ओडिआईमा २ शतक र ५ अर्धशतक सहित ८ सय १२ रन बनाउनुको साथै १९ विकेट लिएका छन् । २५ टि२० आई खेलमा ३ अर्धशतक सहित ५ सय १ रन बनाएका छन् ।

ओमानले अक्टोबर १८ मा नेपालसँग खेल्दै विश्वकप छनोटको सुरुवात गर्नेछ । दुबै टोलीलाई यस खेलको नतिजाले निर्णायक पार्नसक्ने बुझिएको छ । फेब्रुअरी १९ मा क्यानडा र फेब्रुअरी २१ मा फिलिपिन्ससँग खेल्नेछ । शीर्ष दुईमा रहन सके सेमिफाइनलमा स्थान बनाउने छ । त्यसअघि ओमानले चारदेशबीचको टि२० आई सिरिज अन्तर्गत नेपालसँग फेब्रुअरी ११ मा खेल्नेछ ।

सिरिज अन्तर्गत नै १२ फेब्रुअरीमा आयरल्यान्ड र १४ फेब्रुअरीमा युएईसँग खेल्ने तालिका छ । आइसिसी क्रिकेट विश्वकप लिग–२ अन्तर्गत युएईसँग तीन ओडिआई खेल खेल्नेछ । पहिलो खेल फेब्रुअरी ५, दोस्रो फेब्रुअरी ६ र तेस्रो फेब्रुअरी ८ मा हुनेछ ।

नेपालमा उत्कृष्ट प्रदर्शनपछि लेखिएको अकिबको जीवनी : नेपाली समर्थककै ‘फ्यान’ बने ओमानी स्टार अकिब