मस्कट (हाम्रो खेलकुद) – नेपालले आइसिसी टि२० विश्वकप ग्लोबल छनोट ए मा ओमानविरुद्ध अनुभवी ब्याटर ज्ञानेन्द्र मल्ल र उच्च लयमा रहेका दीपेन्द्रसिंह ऐरीलाई सस्तैमा गुमाएको छ ।

ओमानको मस्कटमा रहेको अल अमरेत क्रिकेट मैदान १ मा टस हारेर ब्याटिङ थालेको नेपालले खराब सुरुवात गर्दै १० ओभरमा ४ विकेट गुमाउँदै ४५ रन बनाएको छ । सुरुवाती १० ओभर सकिन नपाउँदै प्रमुख चार विकेट गुमाएपछि नेपाल ठूलो संकटमा परेको छ ।
क्रिजमा लोकेश बम २ र आरिफ शेख ७ रनमा अविजित छन् ।

ओपनर आसिफ शेख र कुशल भुर्तेलले पहिलो ओभरमा ६ रनको साझेदारी गरेका थिए । तीव्र गतिका बलर बिलाल खानको पहिलो ओभरको अन्तिम बलमा आसिफ मिडअनमा खवर अलीबाट क्याच आउट हुन पुगे ।

आसिफले ५ बलमा १ चौका सहित ४ रन जोडे । कुशल बिलाल खानको तेस्रो ओभरको चौथो बलमा मिडविकेटमा ५ रनमा खवर अलीबाटनै क्याच आउट भए । कुशलले ८ बलमा १ चौका प्रहार गरे । ज्ञानेन्द्र मल्ललाई तीव्र गतीका बलर फैज बटले सातौं ओभरको पाँचौं बलमा १५ रनमा बोल्ड गरे ।

ज्ञानेन्द्रले १५ बलमा २ चौका प्रहार गरे । ज्ञानेन्द्रले चार देश सम्मिलित टि२० आई सिरिजमा पनि कमजोर प्रदर्शन गरेका थिए । उक्त सिरिजमा ओमानसँग १३, युएईसँग २२ र आयरल्यान्डसँग ५ रनमा आउट भएका थिए ।

दीपेन्द्र नवौं ओभरको तेस्रो बलमा जिशान मकसुदलाई अघि बढेर सट खेल्नेक्रममा मिस भएपछि ११ रनमा विकेटकिपर नसिम खुशीबाट स्टम्पिङ आउट हुन पुगे । १८ बल खेलेका दीपेन्द्रले १ चौका प्रहार गरे । दीपेन्द्रले सिरिजमा ओमानविरुद्ध ७३ रनको अविजित इनिङ खेलेका थिए ।