मस्कट (हाम्रो खेलकुद) – युवा ओपनर कुशल भुर्तेल र दीपेन्द्रसिंह ऐरीले आइसिसी टि२० विश्वकप ग्लोबल छनोट ए मा उत्कृष्ट शतकीय साझेदारीका साथ फिलिपिन्सविरुद्ध नयाँ कीर्तिमान बनाएका छन् ।

मस्कटमा रहेको ओमान क्रिकेट एकेडेमी ग्राउन्ड–२ मा टस हारेर ब्याटिङ थालेको नेपालले निर्धारित २० ओभरमा ३ विकेट गुमाउँदै २ सय १८ रन बनायो । ओपनर कुशल भुर्तेल ६१ बलमा १३ चौका र १ छक्कासहित १ सय ४ रनको अविजित शतकीय इनिङ खेले । दीपेन्द्रसिंह ऐरी ४७ बलमा ६ चौका र ४ छक्का सहित ८३ रनमा आउट भए ।

तेस्रो विकेटका लागि कुशल र दीपेन्द्रले १ सय ७१ रनको शतकीय साझेदारी गरेका थिए । जुन नेपाली टि२० आईमा कुनैपनि विकेटका लागि भएको उच्च साझेदारी हो । यसअघि नेपालबाट २०१९ मा सिंगापुरविरुद्ध पारस खड्का र आरिफ शेखले दोस्रो विकेटका लागि १ सय ४५ रनको अविजित शतकीय साझेदारी गरेका थिए । २०२१ मा कुशल भुर्तेल र आसिफ शेखले पहिलो विकेटका लागि नेदरल्यान्ड्सविरुद्ध १ सय १६ रनको ओपनिङ साझेदारी गरेका थिए ।

विश्व टि२० आईमा कुशल र दीपेन्द्रले गरेको यो नवौं कुनैपनि विकेटका लागि भएको उच्च साझेदारी हो । तेस्रो विकेटका लागि भएको तेस्रो ठूलो साझेदारी हो । तेस्रो विकेटका रुपमा टि२० आईमा सर्वाधिक साझेदारी २०२० मा न्युजिल्यान्डका डेभन कन्वे र ग्लेन फिलिप्सले १ सय ८४ रनको साझेदारी गरेका थिए ।

इंग्ल्यान्डका डेविड मलान र कप्तान ओईन मोर्गनले २०१९ मा न्युजिल्यान्डविरुद्ध तेस्रो विकेटका लागि १ सय ८२ रनको साझेदारी गरेका थिए । टि२० आईमा सर्वाधिक साझेदारी अफगानिस्तानका हज्रतुल्लाह जजाई र उस्मान घानीले २०१९ मा आयरल्यान्डविरुद्ध २ सय ३६ रनको साझेदारी गरेका थिए ।

कुशलले ५७ बलमा आफ्नो पहिलो अन्तर्राष्ट्रिय शतक प्रहार गरेका गरेका थिए । कुशल नेपालबाट टि२० आईमा शतक प्रहार गर्ने तेस्रो खेलाडी बनेका छन् । कुशलअघि नेपालबाट २०१९ को १३ औं दक्षिण एसियाली खेलकुद (साग) मा भुटानविरुद्ध ज्ञानेन्द्र मल्लले ५५ बलमा १ सय ७ रनको शतकीय इनिङ खेलेका थिए ।

पारस खड्काले २०१९ मा सिंगापुरविरुद्ध ५२ बलमा १ सय ६ रनको अविजित शतकीय इनिङ खेल्दै टि२० आईमा शतक प्रहार गर्ने पहिलो नेपाली खेलाडी बनेका थिए ।