काठमाडौं (हाम्रो खेलकुद) – नेपालले त्रिकोणात्मक टि२० आई सिरिजमा पपुवा न्युगिनीसँग टस हारेर पहिला ब्याटिङ गर्ने भएको छ ।

टियु मैदानमा पपुवा न्युगिनीका कप्तान असाद भालाले टस जितेर पहिला फिल्डिङ गर्ने निर्णय लिएका हुन् । नेपालले आजको खेलमा आक्रामक ब्याटर आदिल अन्सारीलाई डेब्यू दिएको छ । नेपालले कुशल मल्लको स्थानमा आदिललाई डेब्यू दिएको हो ।

आदिललाई नेपाली क्रिकेट टोलीका पूर्व क्रिकेटर तथा प्रमुख छनोटकर्ता दीपेन्द्र चौधरीले डेब्यू दिएका हुन् । आदिल विष्फोटक ब्याटिङको लागि माहिर छन् । उनले आजको खेलमा फिनिसरको भूमिका निर्वाह गर्नेछन् ।

ठूला ठूला सट र मध्यगतिको बलिङको लागि चिनिन्छन् । आदिलले एपिएफविरुद्ध १४ बलमा २ चौका र ४ छक्कासहित ३५ रनको इनिङ खेलेका थिए । गत डिसेम्बरमा यू–१९ एसिया कपमा कुवेतविरुद्ध ४९ रन जोडेका थिए ।

यू–१९ राष्ट्रिय प्रतियोगितामा सुदूरपश्चिम प्रदेशले प्रस्तुत गरेको २ सय ९१ रनको लक्ष्य ४९.१ ओभरमा पूरा गर्न उनले विष्फोटक ब्याटिङ गरेका थिए । उनले ४३ बलमा ७ चौका र ६ छक्कासहित ८७ रनको विष्फोटक इनिङ खेलेका थिए ।

नेपाल विजयी भएमा ६ अंकका साथ एक खेल अगावै फाइनलमा पुग्नेपक्का हुनेछ । पहिलो खेलमा नेपालले पिएनजीलाई १५ रन र दोस्रो खेलमा मलेसियालाई ६ विकेटले पराजित गरेको थियो । नेपाल र पिएनजीबीच दुई टि२० आई खेल भएको छ । नेपाल १ खेलमा जित र १ खेलमा पराजित भएको छ ।

नेपालको प्लेइङ ११ :

सन्दीप लामिछाने (कप्तान), आदिल अन्सारी, कुशल भुर्तेल, सोमपाल कामी, दीपेन्द्रसिंह ऐरी, आसिफ शेख , करण केसी, अभिनाश बोहरा, दीलिप नाथ (विकेटकिपर), आरिफ शेख र रोहित पौडेल ।