काठमाडौं (हाम्रो खेलकुद) – तीव्र गतिका बलर सोमपाल कामी र करण केसीको उत्कृष्ट बलिङमा जिम्बावे ए ले दोस्रो अभ्यास खेलमा नेपाललाई ८८ रनको सामान्य लक्ष्य दिएको छ । टियु क्रिकेट मैदानमा टस हारेर ब्याटिङ थालेको जिम्बावे ए ३१.५ ओभरमा ८७ रनमा अल आउट भयो ।

जिम्बावे ए का मध्यक्रमका जनथान क्याम्पबेलले ४२ बलमा ३ चौका र १ छक्कासहित सर्वाधिक २७ रन बनाए । ब्राड इभान्सले ३५ बलमा १ चौका र १ छक्कासहित २० रनमा अविजित रहे ।

तीव्र गतिका बलर करण केसीको इनिङको पहिलो बलम ओपनर इनोसेन्ट कैया एज लागेर आसिफ शेखबाट क्याच आउट भए । चौथो ओभरको पाँचौं बलमा सोमपाल कामीले तडिवानाशे मरुमानीलाई ४ रनमा विकेटकिपर विनोद भण्डारीबाट क्याच गराए ।

करण केसीले अर्को ओभरमा चेफाश झुवाओलाई १० रनमा आसिफबाट क्याच गराए । सोमपाल कामीले रोय कैयालाई ४ रनमा बोल्ड आउट गरेपछि जिम्बावे ए ७.२ ओभरमा २४–४ को कमजोर अवस्थामा पुगेको थियो ।

चोभार एण्डबाट करण र टियु एण्डबाट सोमपाल कामीकोले जिम्बावे एको ब्याटिङ धरासय बनाएका थिए । सुरुवाती १४ ओभर सोमपाल र करणको मात्र स्पेल थियो । करणले क्लाइभ मडान्डेलाई १ रनमा बोल्ड गरे । ल्यूक जोंगवेलाई सागर ढकालले ८ रनमा बोल्ड आउट गरे ।

करण केसीले ८ ओभरमा ३ मेडनसहित १७ रन खर्चेर ३ विकेट लिए । सोमपाल कामीले ७ ओभरमा १६ रन खर्चेर ३ विकेट लिए । सन्दीप लामिछानेले २ र सागर ढकालले १ विकेट लिए ।