एजेन्सी – वेस्टइन्डिजका विष्फोटक ब्याटर तथा कप्तान निकोलस पुरनले पाकिस्तानसँग तेस्रो ओडिआई खेलमा सानदार बलिङ गरेका छन् । अन्तर्राष्ट्रिय क्रिकेट करिअरमा पहिलो पटक सानदार बलिङ गर्नेक्रममा पुरनले पाकिस्तानको शीर्षक्रम धरासय बनाउन पुगे ।

मुल्तान क्रिकेट स्टेडियममा टस जितेर पहिला ब्याटिङ थालेको पाकिस्तान ३३ ओभरमा १५५–५ को कमजोर अवस्थामा छ । पाकिस्तानलाई कमजोर अवस्थामा पुर्याउन पुरनले स्पिन बलिङ गर्दै १० ओभरमा ४८ रन खर्चेर प्रमुख चार विकेट लिए ।

पाकिस्तानलाई ओपनर फखार जमान र ईमाम उल हकले पहिलो विकेटका लागि १६.४ ओभरमा ८५ रनको साझेदारी गर्दै राम्रो सुरुवात दिलाएका थिए । प्रमुख बलरले विकेट लिन नसकेपछि पुरन आफैं बलिङमा आएका थिए ।

पुरनले आफ्नो तेस्रो ओभरको रुपमा जमानलाई ३५ रनमा बोल्ड गर्दै आफ्नो पहिलो अन्तर्राष्ट्रिय विकेट लिए । जमानले ४८ बलमा ४ चौका प्रहार गरे । पुरनले २३ औं ओभरमा दुई महत्वपूर्ण विकेट लिए । पुरनको २३ औं ओभरको तेस्रो बलमा इमाम उल हक टप एज लागेर विकेटकिपर शाई होपबाट ६२ रनमा क्याच भए ।

६८ बल खेल्दै हकले ७ चौका र १ छक्का प्रहार गरे । ओडिआईमा हकको लगातार सातौं अर्धशतक हो । एक बलपछि मोहम्मद हरिसलाई अकिल हुनसैबाट शून्यमा क्याच गराए । पुरनले पाकिस्तानका विकेटकिपर मोहम्मद रिजवानलाई पनि शाई होपबाट ११ रनमा क्याच गराउँदै वेस्टइन्डिजलाई सानदार पूनरागमन गराउन सफल भए ।

रिजवान एज लागेर आउट भएका थिए । विश्व क्रिकेटमा विष्फोटक विकेटकिपर ब्याटरको पहिचान बनाएका पुरनले पहिलो पटक बलिङमा सानदार प्रदर्शन गरेका हुन् । तीन ओडिआई खेलको सिरिज वेस्टइन्डिजले एक खेल अगावै गुमाई सकेको छ ।