एजेन्सी – अनुभवी ब्याटर बाबर हायत र अलराउन्डर यासिम मुर्तजा चम्कदा हङकङले टि२० एसिया कप छनोटमा लगातार दोस्रो जित निकालेको छ । कुवेतलाई ८ विकेटले पराजित गर्दै हङकङ शनिबारदेखि युएईमा हुने टि२० एसिया कपमा छनोट हुँदै भारत र पाकिस्तानसँग खेल्ने सम्भावना बढाएको छ ।

जितको लागि १ सय ५२ रनको विजयी लक्ष्य पछ्याएको हङकङले १७.४ ओभरमा २ विकेट गुमाउँदै पूरा गर्यो । हङकङको जितमा बाबर हायत ३० बलमा २ चौका र ५ छक्कासहित ५३ रनमा अविजित रहे । कप्तान निजाकत खान ४३ बलमा ४ चौका र १ छक्कासहित ५० रनमा आउट भए ।

ओपनर यासिम मुर्तजा ३३ बलमा ७ चौका र १ छक्कासहित ४६ रनमा आउट भए । कुवेतका मोहम्मद शफिक र अदनान इद्रिसले एक एक विकेट लिए ।

त्यसअघि अलअमरेत क्रिकेट मैदानमा टस हारेर ब्याटिङको निम्तो पाएको कुवेतले निर्धारित २० ओभरमा ९ विकेट गुमाउँदै १ सय ५१ रन बनायो । एक समय ५७–६ को दयनीय अवस्थामा पुगेको कुवेतलाई एडसन सिल्भाले विष्फोटक ब्याटिङका साथ मध्यम योगफलमा पुयाएका थिए । सिल्भाले ३० बलमा १ चौका र ६ छक्कासहित ५६ रनको विष्फोटक इनिङ खेले ।

उस्मान पटेल १९ र मोहम्मद अस्लाम २१ रनमा आउट भए । हङकङका अजिज खान, एहसान खान र यासिम मुर्तजाले दुई दुई विकेट लिए । हङकङले पहिलो खेलमा सिंगापुरलाई ८ विकेटले हराएको थियो ।

हङकङले अन्तिम तथा निर्णायक खेलमा युएईसँग आज राती खेल्नेछ । हङकङ विजयी भएमा एसिया कपमा छनोट हुनेछ । पराजित भएमा भने नेटनरेटका कारण बाहिरिने छ । समान २ खेलमा ४ अंकका साथ शीर्ष स्थानमा रहेको हङकङको नेटनरेट ०.७१६ छ । २ अंकका साथ दोस्रो स्थानमा रहेको युएईको नेटरनरेट १.०४५ छ ।

युएई भने पहिलो खेलमा कुवेतसँग एक विकेटले पराजित भएको थियो । दोस्रो खेलमा सिंगापुरलाई ४७ रनले हराएको थियो ।
एसिया कप २७ अगष्ट देखि सुरुहुनेछ । समूह ए मा भारत, पाकिस्तान र छनोट हुने एक टोली हुनेछन् । समूह बी मा श्रीलंका, बंगलादेश र अफगानिस्तान छन् ।