नेपालको मध्यम सुरुवात

काठमाडौं (हाम्रो खेलकुद) – नेपालले दोस्रो एकदिवसिय अभ्यास खेलमा घरेलु टोली केन्याविरुद्ध मध्यम सुरुवात गरेको छ । नैरोबीमामा रहेको जिमखाना क्लब ग्राउन्डमा टस जितेर पहिला ब्याटिङ थालेको नेपालले सुरुवाती १७ ओभरमा १ विकेट गुमाउँदै ७५ रन बनाएको छ ।

नेपालका देव खनाल ५२ बलमा ४ चौकासहित ३७ रनमा अविजित छन् । ज्ञानेन्द्र मल्ल ३४ बलमा ४ चौकासहित २५ रनमा अविजित छन् । पहिलो विकेटका लागि ओपनर देव खनाल र अर्जुन साउदले ५.५ ओभरमा १९ रनको साझेदारी गरेका थिए । अर्जुन १६ बलमा ५ रन बनाउँदै आउट भए ।

तीन एकदिवसिय अभ्यास सिरिज अन्तर्गत पहिलो खेलमा नेपाल ७ विकेटले विजयी भएको थियो । उक्त खेलमा आसिफ शेखले १ सय १० रनको शतकीय इनिङ खेलेका थिए । आसिफलाई विश्राम दिँदै नेपालले आज देव खनाललाई मौका दिएको छ । अन्तिम खेल सोमबार हुनेछ । पाँच टि२० आई खेलको सिरिज भने नेपालले ३–२ ले जितेको थियो ।