काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगमा काठमाडौं नाइट्सलाई १ सय ८४ रनको विशाल लक्ष्य दिएको छ । टियु क्रिकेट मैदानमा टस जितेर पहिला ब्याटिङ थालेको लुम्बिनी अल स्टार्सले निर्धारित १७ ओभरमा ६ विकेट गुमाउँदै १ सय ८३ रन बनायो ।

काठमाडौं नाइट्स समयमै नआएपछि टस ढिलो हुँदा खेल १७ ओभरमा झारिएको थियो । लुम्बिनीका ओपनर हरमीत सिंहले ३६ बलमा २ चौका र ८ छक्कासहित सर्वाधिक ७० रन बनाए । हरमीतको यो लगातार दोस्रो अर्धशतक हो । हरमीतले जनकपुर रोयल्सविरुद्ध ७३ रन बनाएका थिए ।

अर्का ओपनर लाहिरु मिलान्था २९ बलमा २ चौका र १ छक्कासहित २६ रनमा आउट भए । गुलशन झा ११ बलमा १ चौका र २ छक्कासहित २१ रनमा बोल्ड आउट भए ।

कुशल भुर्तेल १० बलमा १ चौका र १ छक्कासहित १५ र दीपेन्द्रसिंह ऐरी शून्यमा आउट भए । ह्यारी टेक्टर ८ बलमा २ छक्कासहित १७ रनमा आउट भए । अनिलकुमार शाह ५ बलमा २ चौका र १ छक्कासहित १६ र विपुल शर्मा ५ रनमा अविजित रहे ।

काठमाडौंका तीव्र गतिका बलर अभिनाश बोहराले ४ ओभरमा ३२ रन खर्चेर ३ विकेट लिए । बसिर अहमदले २ ओभरमा ३५ रन खर्चेर २ विकेट लिए । अनिल खरेलले एक विकेट लिए ।