काठमाडौं(हाम्रो खेलकुद) –प्रधानमन्त्री पुष्पकमल दाहल प्रचण्डले नेपाली क्रिकेट टोलीका खेलाडीलाई भेट्ने भएका छन् । प्रचण्डले आज(बिहीबार) दिउँसो साढे एक बजे नेपाली क्रिकेट टोलीलाई प्रधानमन्त्री कार्यलय बालुवाटार बोलाएर भेट गर्न लागेका हुन् ।

नेपाल क्रिकेट संघ (क्यान)का कार्यवाहक सचिव दुर्गाराज पाठकले प्रधानमन्त्रीले बालुवाटार भेट्न बोलाएको पुष्टि गरेका छन् ।नेपालले घरेलु मैदान टियुमा पहिलो पटक आइसिसी विश्वकप लिग २ त्रिकोणात्मक ओडिआई सिरिजमा चारै खेलमा जित हात पारेको थियो । नेपालले एकै सिरिजमा पहिलो पटक लगातार चार जित हात पारेको थियो ।

नेपालले पहिलो खेलमा नामिबियालाई दुई विकेट, दोस्रो खेलमा स्कटल्यान्डलाई तीन विकेट, नामिबियालाई तीन विकेट र स्कटल्यान्डलाई दुई विकेटले हराएको थियो ।

लगातार तीन जितपछि प्रचण्डले खेलाडीलाई पुरस्कार दिने आश्वासन समेत दिएका थिए । ‘लगातार तेस्रो जित निकाल्न सफल भएकोमा नेपाली क्रिकेट टिमलाई हार्दिक बधाई ज्ञापन गर्दै उत्कृष्ट खेलाडीहरुलाई सरकारको तर्फबाट प्रोत्साहित र पुरस्कृति गरिने विश्वास दिलाउँछु’, प्रचण्डले तीन जितपछि सामाजिक सञ्जालमा भनेका थिए ।

नेपालले लगातार चार खेल जितेपछि शीर्ष पाँचमा पर्दै सोझै ओडिआई मान्यता प्राप्त बाँकी ८ मध्य ५ खेल जित्नुपर्ने हुन्छ । शीर्ष तीनमा पर्न नेपालले बाँकी सबै खेल जित्नुपर्ने हुन्छ । नेपाली क्रिकेट टोली अव शनिबार युएई जानेछ ।

नेपालले अब २७ फेब्रुअरीमा पपुवा न्युगिनी, मार्च २ मा युएई, मार्च ३ मा पपुवा न्युगिनी र मार्च ६ मा युएईसँग खेल्नेछ । त्यसपछि नेपालले मार्च ९ मा टियु क्रिकेट मैदानमा पपुवा न्युगिनीसँग खेल्नेछ । मार्च १२ मा युएई, मार्च १३ मा पपुवा न्युगिनी र मार्च १६ मा युएईसँग प्रतिस्पर्धा गर्नेछ । जुन लिग-२ को अन्तिम खेल समेत हुनेछ ।