एजेन्सी – नामिबिया आइसिसी विश्वकप लिग–२ त्रिकोणात्मक ओडिआई सिरिज अन्तर्गत घरेलु टोली युएईसँग मात्रै ९१ रनमा अल आउट भएको छ । दुबई इन्टरनेशल क्रिकेट स्टेडियममा टस हारेर पहिला ब्याटिङको निम्तो पाएको नामिबिया ३१.१ ओभरमा ९१ रनमा अल आउट भयो ।

लज्जास्पद ब्याटिङ गर्नेक्रममा नामिबियाका ८ खेलाडीले दोहोरो अंकमा रन बनाउन सकेनन् । नामिबियाको ओडिआईमा यो तेस्रो कम योगफल हो । यसअघि नामिबिया सबैभन्दा कम योगफलमा २००३ मा अष्ट्रेलियाविरुद्ध ४५ रनमा अल आउट भएको थियो । त्यसैवर्ष पाकिस्तानसँग ८४ रनमा अल आउट भएको थियो ।

त्यसपछि यो सबैभन्दा कम योगफल हो । नामिबियाका रुबेन ट्रम्पलम्यानले ४१ बलमा २ चौका र १ छक्कासहित सर्वाधिक ३० रनमा आउट भए । विकेटकिपर जेन ग्रीन २८ बलमा १ चौकासहित २४ र माइकल भान लिंगेनले १५ रन बनाए । अन्य कुनैपनि नामिबियाका ब्याटरले दोहोरो अंकमा रन बनाउन सकेनन् ।

युएईका तीव्र गतिका बलर जहुर खानले ८ ओभरमा १ मेडनसहित १९ रन खर्चेर ३ विकेट लिए । स्पिनर आयन खान ९ ओभरमा १ मेडनसहित २१ रन खर्चेर ३ विकेट लिए । अर्का स्पिनर कार्तिक मयाप्पनले ३.१ ओभरमा १६ रन खर्चेर ३ विकेट लिए । नामिबिया ३४ खेलमा १८ मा जित र १५ मा हारसहित ३७ अंकका साथ तेस्रो स्थानमा छ ।

युएई २६ खेलमा १२ मा जित र ११ मा हारसहित २७ अंकका साथ पाँचौं स्थानमा छ । शीर्ष तीनमा रहँन दुबै टोलीलाई सबै खेल जित्नुपर्ने दबाब छ । युएईले यस खेलसँगै १० र नामिबियाले दुई खेल खेल्न बाँकी छ ।