एजेन्सी – युवा ब्याटर रिंकु सिंहले अन्तिम पाँच बलमा लगातार पाँच छक्का हानेपछि कोलकाता नाइट राइडर्सले इन्डियन प्रिमियर लिग(आइपिएल) २०२३ मा गुजरात टाइटन्समाथि तीन विकेटको रोमान्चक जित हात पारेको छ । कोलकातालाई जितको लागि अन्तिम ६ बलमा २९ रन चाहिँएको थियो ।

उमेश यादवले एक रन दिँदै रिंकुलाई स्ट्राइक दिए । रिंकु सिंहले यश दयाललाई अन्तिम पाँच बलमा लगातार पाँच छक्का हानेपछि कोलकाताले अविश्वसनीय जित हात पारेको हो ।

जितको लागि २ सय ५ रनको विशाल विजयी लक्ष्य पछ्याएको कोलकाताले निर्धारित २० ओभरमा ७ विकेट गुमाउँदै पूरा गर्यो । कोलकाताको जितमा हिरो बनेका रिंकु २१ बलमा १ चौका र ६ छक्कासहित ४८ रनमा अविजित रहे । वेंकटेश ऐरले ४० बलमा ८ चौका र ५ छक्कासहित सर्वाधिक ८३ रनको योगदान दिए ।

कार्यवाहक कप्तान राशिद खानले १७ औं ओभरमा ह्याट्रिक लिँदै लिएपनि जित दिलाउन सकेनन् । कोलकातालाई जितको लागि २४ बलमा ५० रन चाहिँएको थियो । राशिद खानको पहिलो बलमा फिनिसर आन्द्रे रसेल एज लागेर वैकल्पिक विकेटकिपर केएस भरतबाट क्याच आउट भए ।

लगत्तै अर्को बलमा सुनिल नारायण ठूलो सटको धुनमा क्याच आउट भए । तेस्रो बलमा राशिद खानले शार्दुल ठाकुरलाई एलबीडब्लू आउट गर्दै ह्याट्रिक पूरा गरेका थिए ।

ओपनर रहमानउल्लाह गुरबाज १२ बलमा १ चौका र १ छक्कासहित १५ रन जोड्दै आउट भएका थिए । तीव्र गतिका बलर मोहम्मद शामीको बलमा यश दयालबाट क्याच आउट भएका थिए । नारायण जगदीशन ८ बलमा ६ रन बनाउँदै आउट भएका थिए । तेस्रो विकेटका लागि कप्तान नितिश राणा र ऐरले ५५ बलमा १ सय रनको सानदार शतकीय साझेदारी गरेका थिए ।

नितिश २९ बलमा ४ चौका र ३ छक्कासहित ४५ रनमा आउट भए । उनी तीव्र गतिका बलर अल्जारी जोशेफको बलमा मिडअफमा मोहम्मद शामीबाट क्याच आउट भएका थिए । ऐर जोशेफको १६ औं ओभरको पाँचौं बलमा लङअनमा क्याच आउट भएका थिए ।

राशिद खानले ४ ओभरमा ३७ रन खर्चेर ३ विकेट लिए । अल्जारी जोशेफले ४ ओभरमा २७ रन खर्चेर २ विकेट लिए । मोहम्मद शामी र जोश लिटिलले एक एक विकेट लिए ।

त्यसअघि नरेन्द्र मोदी स्टेडियम अहमदाबादमा टस जितेर पहिला ब्याटिङ रोजेको गुजरातले निर्धारित २० ओभरमा ४ विकेट गुमाउँदै २ सय ४ रन बनाएको थियो । गुजरातका विजय शंकर २४ बलमा ४ चौका र ५ छक्कासहित सर्वाधिक ६३ रनमा अविजित रहेपनि जितको लागि पर्याप्त रहेन । युवा ब्याटर साई सुदर्शनले ३८ बलमा ३ चौका र २ छक्कासहित ५३ रन बनाएका थिए ।

गुजरातलाई ओपनर शुभमन गिल र ऋद्धिमान शाहले ४.२ ओभरमा ३३ रन जोड्दै मध्यम सुरुवात दिलाएका थिए । स्पिनर सुनिल नारायणको बलमा नारायण जगदीशनले डिप मिडविकेटमा शाहको उत्कृष्ट क्याच लिएका थिए । उनले १७ बलमा ३ चौकासहित १७ रन बनाएका थिए ।

शुभमन गिल ३१ बलमा ५ चौकासहित ३९ रनमा आउट भए । दोस्रो विकेटका लागि गिल र सुदर्शनले ६७ रनको साझेदारी गरेका थिए । सयुश शर्माले अभिनव मनोहरलाई १४ रनमा बोल्ड गरेका थिए । कोलकाताको जितमा सुनिल नारायणले ४ ओभरमा ३३ रन खर्चेर ३ विकेट लिए । सुयश शर्माले ४ ओभरमा ३५ रन खर्चेर १ विकेट लिए ।

गुजरातले पहिलो खेलमा चेन्नई सुपर किंग्सलाई ५ विकेट र दोस्रो खेलमा दिल्ली क्यापिटल्सलाई ६ विकेटले पराजित गरेको थियो । गुजरातले अव बिहीबार पन्जाब किंग्ससँग खेल्नेछ ।

कोलकाता पहिलो खेलमा पन्जाबसँग ७ रनले पराजित भएको थियो । दोस्रो खेलका कोलकाताले रोयल च्यालेन्जर्स बेंगलोरलाई ८१ रनले हराएको थियो । कोलकाताले अव शुक्रबार सनराइजर्स हैदराबादसँग खेल्नेछ । आजको अर्को खेलमा पन्जाब र हैदराबादबीच प्रतिस्पर्धा हुँदैछ ।