एजेन्सी – कप्तान फाफ डु प्लेसिस, विराट कोहली र ग्लेन म्याक्सवेलको सानदार ब्याटिङमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२३ को १५ औं खेलमा लखनऊ सुपर जायन्ट्सलाई २ सय १३ रनको विशाल लक्ष्य दिएको छ ।

घरेलु मैदान चिन्नास्वामी रंगाशालामा टस हारेर पहिला ब्याटिङको निम्तो पाएको बेंगलोरले निर्धारित २० ओभरमा २ विकेट गुमाउँदै २ सय १२ रन बनायो । बेंगलोरका कप्तान फाफ डु प्लेसिस ४६ बलमा ५ चौका र ५ छक्कासहित सर्वाधिक ७९ रनमा अविजित रहे ।

पहिलो विकेटका लागि डु प्लेसिस र विराट कोहलीले ११.३ ओभरमा ९६ रनको सानदार साझेदारी गरेका थिए । विराट कोहली ४४ बलमा ४ चौका र ४ छक्कासहित ६१ रन बनाउँदै क्याच आउट भए । कोहली स्पिनर अमित मिश्राको बलमा ठूलो सट खेल्ने धुनमा डीप मिडविकेटमा मार्कस स्टोइनिसबाट क्याच आउट भएका थिए ।

त्यसपछि दोस्रो विकेटका लागि डु प्लेसिस र ग्लेन म्याक्सवेलले ५० बलमा १ सय १५ रनको आक्रामक शतकीय साझेदारी गरेका थिए । म्याक्सवेल २९ बलमा ३ चौका र ६ छक्कासहित ५९ रनमा आउट भए । म्याक्सवेल अन्तिम ओभरको पाँचौं बलमा मार्क वुडको बलमा बोल्ड भएका थिए ।

विराट कोहली र डु प्लेसिसले समान ३५ बलमा अर्धशतक हानेका थिए । ग्लेन म्याक्सवेलले २४ बलमा अर्धशतक हानेका थिए ।
लखनऊका अमित मिश्राले २ ओभरमा १८ रन खर्चेर १ विकेट लिए । मार्क वुडले ४ ओभरमा १ मेडनसहित ३२ रन खर्चेर १ विकेट लिए ।

बेंगलोर दोस्रो जितको खोजीमा हुनेछ । पहिलो खेलमा बेंगलोरले मुम्बई इन्डियन्सलाई ८ विकेटले हराएको थियो । तर बेंगलोर दोस्रो खेलमा कोलकाता नाइट राइडर्ससँग ८१ रनले पराजित भएको थियो । लखनऊ तेस्रो जित निकाल्न चाहन्छ । लखनऊले दिल्लीलाई ५० रन र हैदराबादलाई ५ विकेटले हराएको थियो । चेन्नई सुपर किंग्ससँग १२ रनले पराजित भएको थियो ।