एजेन्सी – सिकन्दर राजा र कप्तान साम करनको उत्कृष्ट प्रदर्शनमा पन्जाब किंग्सले इन्डियन प्रिमियर लिग (आइपिएल) २०२३ को २१ औं खेलमा लखनऊ सुपर जायन्ट्सलाई दुई विकेटले पराजित गरेको छ । पन्जाब तेस्रो जितका साथ अंक तालिकामा चौथो स्थानमा उक्लिएको छ ।

जितको लागि १ सय ६० रनको मध्यम विजयी लक्ष्य पन्जाबले १९.३ ओभरमा ८ विकेट गुमाउँदै पूरा गर्यो । पन्जाबको जितमा सिकन्दर राजाले ४१ बलमा ४ चौका र ३ छक्कासहित सर्वाधिक ५७ रनको योगदान दिए । आइपिएलमा पहिलो सिजन खेलेका उनी पहिलो पटक प्लेयर अफ द म्याच चुनिए ।

म्याथ्यु सर्टले २२ बलमा ५ चौका र १ छक्कासहित ३४ रनमा आउट भए । ओपनर अथर्भ टाडे शून्य, प्रभसिमरन सिंह ४, हरप्रीत सिंह भाटिया २२, कप्तान साम करन ६, जितेश शर्मा २ र हरप्रीत ब्रार ६ रनमा आउट भए ।

शाहरुख खान १० बलमा १ चौका र २ छक्कासहित २३ रनमा अविजित रहँदै जित पक्का गराए । युधविर सिंह चरक, मार्क वुड र रवि विश्रोईले समान दुई विकेट लिए । कृष्णाप्पा गोथम र क्रुनाल पान्ड्याले एक एक विकेट लिए ।

त्यसअघि घरेलु मैदान एककानामा टस हारेर पहिला ब्याटिङको निम्तो पाएको लखनऊले निर्धारित २० ओभरमा ८ विकेट गुमाउँदै १ सय ५९ रन बनाएको थियो ।

लखनऊका ओपनर तथा कप्तान लोकेश राहुलले ५६ बलमा ८ चौका र १ छक्कासहित सर्वाधिक ७४ रन बनाएपनि टोलीले जित हात पार्न सकेन । राहुल केहि सुस्त गतिमा खेलेका थिए । ओपनर कायल मेयर्स र राहुलले ७.४ ओभरमा ५३ रनको साझेदारी गर्दै राम्रो लखनऊलाई राम्रो सुरुवात दिलाएका थिए । मेयर्स २३ बलमा १ चौका र ३ छक्कासहित २९ रनमा आउट भए ।

मेयर्स स्पिनर हरप्रीत ब्रारको बलमा ठूलो सट खेल्ने धुनमा डिप स्क्वायर लेगमा हरप्रीत सिंहबाट क्याच आउट हुन पुगेका थिए । सिकन्दर राजाको बलमा दीपक हुडा दुई रनमा एलबीडब्लू आउट भए । बेंगलोरविरुद्ध १५ बलमै अर्धशतक हानेका निकोलस पुरन गोल्डेन डक आउट भएका थिए । रबाडाले पुरनलाई शाहरुख खानबाट क्याच गराएका थिए ।

क्रुनाल पान्ड्या १७ बलमा २ चौकासहित १८ रनमा रबाडाको बलमा आउट भए । मार्कस स्टोइनिस ११ बलमा २ छक्कासहित १५ रनमा विकेटकिपर जितेश शर्माबाट क्याच गराए । कप्तान साम करनले आफ्नो बलमा रिभ्यु लिँदै पेभेलिएन फर्काएका थिए ।

पन्जाबका कागिसो रबाडाले ४ ओभरमा ३४ रन खर्चेर २ विकेट लिए । कप्तान साम करनले ४ ओभरमा ३१ रन खर्चेर ३ विकेट लिए । अर्शदीप सिंह, हरप्रीत ब्रार र सिकन्दर राजाले समान एक विकेट लिए ।

यस खेलमा पन्जाबको कप्तानी साम करनले गरेका थिए । शिखर धवन घाइते भएपछि साम करनले कप्तानीमा डेब्यू खेलमा पन्जाबले जितेको हो । लखनऊ ५ खेलमा ३ मा जित र २ मा हारसहित ६ अंकका साथ दोस्रो स्थानमा छ । राजस्थान ४ खेलमा ३ मा जित र १ मा हारसहित ६ अंकका साथ शीर्ष स्थानमा छ ।