काठमाडौं (हाम्रो खेलकुद) – गतवर्ष कार्तिकमा सम्पन्न पाँचौं संस्करणको प्रधानमन्त्री कप एकदिवसीय राष्ट्रिय प्रतियोगिता विजेता नेपाल एपिएफ क्लबले अझै पुरस्कार रकम पाएको छैन ।

प्रतियोगिता विजेता पुरस्कार वापत एपिएफ क्लबले १० लाख रुपैयाँ पाउनु पर्ने भएपनि हालसम्म नेपाल क्रिकेट संघ (क्यान) ले नगद पुरस्कार दिएको छैन । राष्ट्रिय खेलकुद परिषद् (राखेप) को आर्थिक सहयोगमा क्यानले प्रधानमन्त्री कप आयोजना गर्दै आएको छ ।

राखेपले प्रतियोगिता वापत क्यानलाई दिनुपर्ने ६० लाख रुपैयाँ भने दिइसकेको जनाएको छ । राखेपका लेखा प्रमुख ऋषिराम पोखरेलले क्यानले उक्त पैसा पहिला नै लागिसकेको बताए । तर क्यानले विजेता एपिएफलाई उपाधि जितेवापतको रकम हालसम्म नदिएको एपिएफका खेलकुद विभाग प्रमुख विजय केसीले हाम्रो खेलकुदलाई जानकारी दिएका छन् ।

‘अहिलेसम्म उक्त रकम पाएका छैनौं । क्यानलाई सोध्दा अर्को हप्ता भन्दै आउनु भएको छ । तर अहिलेसम्म आएको छैन’, केसीले भने ।

स्रोतका अनुसार क्यानले उक्त पैसा आफैं चलाएको जनाएको छ । आइसिसीले क्यानलाई रकम पठाएपछि दिने बताएको बुझिएको छ । तर क्यानका कोषाध्यक्ष रोशन सिंहले त्यसो नभएको बताउँछन् ।

‘मेरो हिसाबले वहाँहरुको खातामा उक्त रकम जानुपर्ने हो । बैंकहरु मर्जर हुँदा खाता नमिलेको कारण धेरै जना खेलाडी र जिल्लाहरुको पैसा फिर्ता आएको छ । त्यसैमा वहाँहरुको पनि पर्यो कि जस्तो लागेको छ’, सिंहले हाम्रो खेलकुदसँग भने ।

राखेपले दिएको पैसा आफुहरुले चलाउनु पर्ने अवस्था नभएको सिंहले बताए । ‘राखेपले पैसा दियो । क्यानले पायो । हामीले राखेपको पैसा किन चलाउनु पर्यो । वहाँहरुसँग मेरो पनि कुरा भएको थियो । यदि गएको छैन भने म काठमाडौं फर्केपछि दुई तीन दिनमा फेरि पठाउँछौं’, उनले भने ।

एपिएफले फाइनलमा ४ विकेटले हराउँदै उपाधि जितेको थियो । जितको लागि १ सय ८० रनको विजयी लक्ष्य पछ्याएको एपिएफले ९ बल अगाडि ६ विकेट गुमाउँदै पूरा गरेको थियो ।