काठमाडौं (हाम्रो खेलकुद) – नेपालका अलराउन्डर दीपेन्द्रसिंह ऐरी आइसिसी विश्वकप छनोटको प्लेअफ खेलमा युएईविरुद्ध प्लेयर अफ द म्याच बनेका छन् । नेपाललाई तीन विकेटको जित दिलाउन एक अविस्मरणीय इनिङ खेलेका दीपेन्द्रले प्लेयर अफ द म्याच अवार्ड जितेका हुन् ।

जितको लागि जितको लागि १ सय ८२ रनको विजयी लक्ष्य पछ्याएको नेपालले ४३.२ ओभरमा ७ विकेट गुमाउँदै पूरा गर्यो । नेपालको जितमा दीपेन्द्रसिंह ऐरी ८५ बलमा ७ चौका र २ छक्कासहित ७९ रनमा अविजित रहे ।

दीपेन्द्रले नेपाललाई एक समय २०.५ ओभरमा ६३-६ को अवस्थाबाट खेल जिताएका थिए । दीपेन्द्रले उक्त अवस्थाबाट सातौं विकेटका लागि गुलशन झासँग ४६ बलमा ४३ रनको साझेदारी गरेका थिए । गुलशन १२ रनमा आउट भएपछि नेपाल १०६-७ को अवस्थामा पुगेको थियो । उक्त अवस्थाबाट दीपेन्द्रले सन्दीपसँग मिलेर १५ ओभरमा ७९ रनको साझेदारी गर्दै नेपालको जित पक्का गराएका थिए ।

त्यसअघि जिम्बावेको ताकाशिंगा स्पोर्ट्स क्लबमा टस हारेर पहिला ब्याटिङको निम्तो पाएको युएई ४६।५ ओभरमा १ सय ८१ रनमा अल आउट भएको थियो । दीपेन्द्रले बलिङमा ४ ओभरमा १ मेडनसहित १४ रन खर्चेर १ विकेट लिएका थिए । नेपालले अन्तिम खेल मंगलबार आयरल्यान्डसँग सातौं स्थानको लागि प्रतिस्पर्धा गर्नेछ ।

नेपालले विश्वकप छनोटमा जितेको यो दोस्रो खेल हो । यसअघि अमेरिकालाई ६ विकेटले हराउँदा करण केसी खेलको प्लेयर अफ द म्याच चुनिएका थिए । करणले उक्त खेलमा पावर प्लेममा चार विकेट लिँदै सहज जितको आधार तय गरेका थिए ।

नेपाल समूह ए बाट ४ खेलमा ३ मा हार र १ मा जित सहित चौथो स्थानमा रहेर बाहिरिएको थियो । नेपालले अमेरिकालाई ६ विकेटले हराएको थियो । जिम्बावेसँग ८ विकेट, वेस्टइन्डिजसँग १ सय १ र नेदरल्यान्ड्ससँग ७ विकेटले पराजित भएपछि सुपर सिक्समा पुग्न सकेको थिएन ।